U atmaśfiery ekzapłaniety znajšli vialikuju kolkaść vady
Astranomy pry dapamozie kaśmičnych teleskopaŭ «Chabł» i «Śpitcer» vyjavili vialikuju kolkaść vady ŭ atmaśfiery ekzapłaniety WASP-39b, jakaja znachodzicca ad nas prykładna za 700 śvietłavych hadoŭ i maje masu, padobnuju da masy Saturna. Adznačajecca, što WASP-39b utrymlivaje ŭtraja bolš vady, čym Saturn.
Chacia daśledčyki zdahadvalisia, što ŭbačać vadu na WASP-39b, jany mocna ździvilisia jaje kolkaści. Bo na płaniecie značna bolš vady, čym na Saturnie, i jana, pa ŭsioj bačnaści, sfarmavałasia inakš, havorycca ŭ pres-relizie NASA.
Mnostva vady, vierahodna, pakazvaje na toje, što płanieta raźvivałasia udalečyni ad zorki, padviarhajučysia «bambardziroŭkam» ledzianymi abjektami.
Daśledavanaja ekzapłanieta znachodzicca ŭ suzorji Dzievy i krucicca vakoł soncapadobnaje zorki WASP-39, ździajśniajučy abarot kožnyja čatyry dni. Na hety momant WASP-39b znachodzicca ŭ 20 razoŭ bližej da svajoj zorki, čym Ziamla da Sonca. Pry hetym jana «pryliŭna zabłakavanaja», heta značyć paviornutaja da svajoj zorki zaŭsiody adnym bokam. Na «dzionnym» baku płaniety tempieratura dasiahaje 776,7 hradusa Celsija. Pry hetym mahutnyja viatry pieranosiać ciapło i na jaje «načny» bok, što robić jaho praktyčna takim ža haračym.
U budučyni astranomy spadziajucca vykarystoŭvać dla vyvučeńnia hetaj ekzapłaniety bolš mahutny kaśmičny teleskop «Džejms Ueb», zapusk jakoha čakajecca ŭžo viasnoj nastupnaha hoda.
Ekzapłanietami astranomy nazyvajuć usie płaniety, raźmieščanyja za miežami Soniečnaje sistemy.