Kali b u Radzie BNR zasiadali siońniašnija čynoŭniki… KAŁAŽ
Pamiatajecie kłasičnaje fota Rady BNR? My pasprabavali ŭjavić, jak by jana vyhladała, kab sabrałasia ŭ 2018-m. Zamiest narodnych ministraŭ Biełaruskaj Narodnaj Respubliki pastavim čynoŭnikaŭ, jakija siońnia vykonvajuć tyja samyja funkcyi. Paraŭnoŭvajem!
Pačniom ad nižniaha šerahu, źleva naprava. Na fota 1918-ha pieršy siadzić Aleś Burbis, konsuł BNR u Maskvie. Maskva i siońnia — najvažniejšy zamiežnapalityčny kirunak. Darečna budzie zamianić Burbisa na kiraŭnika MZS Uładzimira Makieja.
Nastupny — Janka Sierada. Jon u 1917-m byŭ staršyniom Usiebiełaruskaha schodu, na jakim i byŭ stvorany ŭrad BNR. Schod jość i siońnia, i kiraŭnika maje: Michaiła Miaśnikoviča, staršyniu Savieta Respubliki Nacyjanalnaha schodu. U pahonach viasielnaha hienierała.
Treci siadzić Jazep Varonka, staršynia Rady BNR, kiraŭnik dziaržavy. …Nu vy ŭsio sami tut bačycie.
I krajni sprava Vasil Zacharka, siabra finansavaj kamisii Rady BNR. U 1918-m Biełaruś, rychtujučysia ŭvodzić ułasnyja hrošy, zarukaj ich stabilnaści mierkavała zrabić svaje lasnyja bahaćci. Siońnia ŭ nas jość i pramysłovaść, i takija-siakija karysnyja vykapni, dyj adnosnaj finansavaj stabilnaści staršyniu Nacbanka Paŭłu Kałaŭru ŭdałosia dasiahnuć.
Pierachodzim da vierchniaha šerahu. Pieršy źleva staić Arkadź Smolič, ministr aśviety. Siońnia na jaho pasadzie — Ihar Karpienka, ministr adukacyi. Praŭda, Smolič jašče i hieohraf byŭ vydatny, a Karpienka dahetul bačyć na mapie nieisnujučuju krainu SSSR.
Zamiest Piotry Krečeŭskaha, narodnaha sakratara kantrolu — Leanid Anfimaŭ, staršynia KDK.
Kastuś Jezavitaŭ, narodny sakratar pa vajskovych spravach, praz sto hadoŭ staŭ Andrejem Raŭkovym, ministram abarony. Ale pa-raniejšamu tryvožna hladzić na ŭschod.
Anton Aŭsianik vykonvaŭ mnoha roznych funkcyj, ale my vybrali takuju: udzieł u adbory delehataŭ na Pieršy Usiebiełaruski Kanhres. Bo kudy ž u Radzie-2018 bieź Lidzii Michajłaŭny!
I jašče adzin siabra Rady, jaki za sto hod źmianiŭ poł. Zamiest Lavona Zajca, kiraŭnika spraŭ sakrataryjata, u 2018-m — nie mienš važny člen kamandy Natalla Kačanava, kiraŭnik Administracyi prezidenta. Choć u sučasnym biełaruskim uradzie jość i sapraŭdny Lavon Zajac — ministr sielskaj haspadarki i charčavańnia. Chto viedaje: mo i da kiraŭnika Administracyi daraście.
Vo takaja vyjšła Rada.
