Premjer Polščy zajaviŭ, što da złačynstvaŭ Chałakostu datyčnyja jak palaki, tak i jaŭrei
Premjer-ministr Polščy Maraviecki svaim vykazvańniem pra Chałakost na kanfierencyi pa biaśpiecy ŭ Miunchienie vyklikaŭ dypłamatyčny skandał ź Izrailem, piša Deutsche Welle. Nietańjachu zajaviŭ ab «prablemie z razumieńniem historyi».
Polski premjer Mateuš Maraviecki na kanfierencyi pa biaśpiecy ŭ Miunchienie.
Pamiž Polščaj i Izrailem razrastajecca kanflikt praź niadaŭna pryniaty ŭ Varšavie «zakon pra Chałakost» i vykazvańni polskaha premjera Mateuša Maravieckaha na palach Miunchienskaj kanfierencyi pa biaśpiecy.
Kiraŭnik urada Izraila Bińjamin Nietańjachu nazvaŭ «aburalnaj» zajavu Maravieckaha pra «habrejskich złačyncaŭ» u suviazi z Chałakostam.
«Jość prablema z razumieńniem historyi, a taksama adsutnaść supieražyvańnia trahiedyi našaha naroda», — napisaŭ Nietańjachu ŭ mikrabłohu Twitter u noč na 18 lutaha.
Maraviecki ŭ subotu, 17 lutaha, na pytańnie izrailskaha žurnalista, ci buduć jaho ličyć u Polščy złačyncam paśla paviedamleńnia pra toje, što polskija susiedzi vydali jaho habrejskuju siamju hiestapa, adkazaŭ: «Viadoma, heta nie karajecca, kali kažuć, što byli polskija złačyncy — hetak ža jak i jaŭrejskija, ruskija, ukrainskija złačyncy, a nie tolki niamieckija».
Niadaŭna pryniaty ŭ Polščy sprečny zakon praduhledžvaje pakarańnie za vykazvańni, jakija kirujučaja partyja «Prava i spraviadlivaść» ličyć «falsifikacyjaj historyi»: kožny, chto dazvolić sabie publična vykazać mierkavańnie pra toje, što polski narod ci polskaja dziaržava byli datyčnyja da złačynstvaŭ nacysckaj Hiermanii, moža być asudžany da pazbaŭleńnia voli terminam da troch hadoŭ.
