Zaŭtra ŭ Minsku pierapachavajuć prach Mahdaleny Radzivił. Siońnia — raźvitańnie
Urnu z pracham pryvieźli ŭ Biełaruś jašče ŭ lipieni 2017 hoda - na VII Źjezd biełarusaŭ śvietu
Na pierapachavańnie urny z pracham biełaruskaj fundatarki Mahdaleny Radzivił u Miensk pryjeduć pradstaŭniki siamji, u tym liku Maciej i Mikałaj Radziviły. Jany naviedajuć imšu siońnia a 18-j hadzinie ŭ kaściole Śviatoha Rocha. U hety čas tam budzie vystaŭlenaja urna z pracham dla raźvitańnia.
Pra heta Radyjo Svaboda paviedamiŭ Alaksandar Sapieha, namieśnik staršyni Asacyjacyi biełarusaŭ Švajcaryi. Jon pradstaŭlaje Radziviłaŭ u spravie pierapachavańnia kniahini Mahdaleny.
«U śniežni ŭžo było vyrašana, što jana budzie pierapachavanaja ŭ kaściole Śviatoha Rocha, — skazaŭ Sapieha. — Ale praz roznyja abstaviny pachavańnie pieranieśli na siaredzinu lutaha».
Da samaha apošniaha momantu va ŭłady, Katalickaj carkvy, hramadzkaści i svajakoŭ Mahdaleny nie było adzinstva ŭ tym, dzie musić być pachavanaja urna z pracham. Razhladalisia čatyry mahčymyja miescy: Čyrvony kaścioł ci Kalvaryjskija mohiłki ŭ Miensku, siamiejnaja kaplica ŭ vioscy Kuchcičy Uździenskaha rajonu ci siamiejny sklep Radziviłaŭ u Niaśvižy.
«Heta kampramis, ja liču, — skazaŭ Sapieha. — Radziviły byli rady, što sytuacyja moža narešcie vyrašycca. Jany byli hatovyja na lubuju prapanovu, akramia Niaśvižu».
Aficyjnaja cyrymonija pierapachavańnia urny z pracham Mahdaleny Radzivił pačniecca sa śviatočnaj imšy ŭ subotu, 16 lutaha a 10-j ranicy. Urna budzie źmieščanaja ŭ admysłovuju nišu ŭ ścianie kaścioła. Na cyrymonii vystupiać pradstaŭniki rodu i aficyjnyja asoby.
