Były kiraŭnik spraŭ z BPC pradaje katedž za $850 tysiač: z basiejnam, futbolnym polem i «siamiejnym chramam» — šmat FOTA
U prodažy źjaviŭsia šykoŭny katedž u pasiołku Juchnaŭka pad Minskam. Na ŭčastku płoščaj u 61 sotku pakupniku prapanujuć vialiki dom, nadzieł pad pčalarstva i nievialiki «siamiejny chram» u mansardzie. Prosiać za ŭsio $850 tysiač.
Jak vyśvietliłasia, naležyć usia hetaja pryhažość siamji kiraŭnika spraŭ departamienta źniešnich suviaziaŭ Biełaruskaha Ekzarchata Alaksandru Hramatnievu.
Alaksandr Hramatnieŭ
«Katedž dla VIP, malaŭničaje miesca, basiejn, mebla», — apisvaje łot pradaviec.
Akramia taho, u domie majecca pamiaškańnie pad biljardnuju, spartzał, dva kaminy. Na ŭčastkach — altanki z barbiekiu.
Futbolnaje mini-pole i pčalnik z vullami. Aŭtamatyčnaje ŭklučeńnie aśviatleńnia, jak u chacie, tak i na ŭčastku.
Nu i nievialičkaja carkva.
Katedž byŭ pabudavany ŭ 2013 hodzie.
Nadzieł z domam aformleny na žonku, Alenu Hramatnievu. Nadzieł ź lasnym masivam, jaki idzie pad pčalarstva, uziaty ŭ pažyćciovuju arendu samim Hramatnievym.
Biez žylla Hramatnievy nie zastanucca. Jany vałodajuć jak minimum jašče dźviuma vialikimi kvaterami ŭ centry Minska, u domie ź vidam na Kastryčnickuju płošču.
Sam Alaksandr Hramatnieŭ u razmovie z «Našaj Nivaj» padkreśliŭ: jon nie śviatar i nikoli im nie byŭ. Aproč taho, u departamiencie pa źniešnich suviaziach ekzarchata jon taksama nie pracuje, bo ŭžo vyjšaŭ na piensiju.
Ale ž ci možna zarabić na taki katedž, pracujučy na carkvu?
«Heta dom majoj maci, jon dastaŭsia jak spadčyna. Maci pamierła, ja jaho pradaju. Na pustym miescy padniali verchał, — paviedamiŭ «Našaj Nivie» Hramatnieŭ. — Toje, što tam napisana pra 2013 hod, — pamyłka. Dom 1992 hoda. Ja z ryełtaram užo havaryŭ, jon niapravilnuju ličbu pastaviŭ.
Što tyčycca cany, to ja razumieju vašaje pytańnie. Ale jakaja roźnica, ja ž moh napisać i $2 miljony, $3 miljony».
U niešmatlikich raniejšych intervju Hramatnieŭ kazaŭ, što raniej zajmaŭsia biznesam. Heta jon paćvierdziŭ.
«A chto ŭ 1990-ja nie zajmaŭsia biznesam?!» — zadajecca pytańniem surazmoŭca. Praŭda, padrabiaznaści raspaviadać nie zachacieŭ.
Ale raniej Hramatnieŭ raskazvaŭ, što chacieŭ pabudavać krejsiernuju jachtu i pajechać u padarožža vakoł śvietu. Jachtu ci to budavali, ci to źbiralisia budavać u Pieciarburhu.
«Nie. Na žal, jachtu nie pabudavaŭ. I vakoł śvietu nie pajechaŭ — jeździŭ tolki na bajdarkach pa rekach», — skazaŭ Hramatnieŭ.
Akramia taho, pa siecivie šyroka razyšoŭsia rapart połackaha jepiskapa Hleba patryjarchu Aleksiju II, napisany ŭ 1996 hodzie. U raparcie jepiskap piša nastupnaje:
«Nasielnica Śviata-Jeŭfrasińnieŭskaha manastyra, skarbnica Antonija stała pryvozić roznych kamiersantaŭ… Adzin z takich kamiersantaŭ dyrektar firmy «Hieja» Alaksandr Hramatnieŭ… staŭ pryjazdžać nočču ŭ manastyr, zabirać Antoniju, i jana adsutničała pa niekalki dzion, viartajučysia z pajezdak z masaj najaŭnych hrošaj… Ludzi Hramatnieva… stali zaprašać siaścior na cełyja tydni, a to i miesiacy na masaž, hiniekałahičnaje abśledavańnie».
Surazmoŭca prakamientavaŭ słovy jepiskapa koratka.
«Kali čałaviek vyrašyŭ pamyi vylić, to navošta mnie admyvacca ad ich? Vy ž razumiejecie, što heta łuchta», — skazaŭ Hramatnieŭ.