Japonija padaryła balnicam na Homielščynie $130 tysiač na kuplu abstalavańnia
Cyrymonija padpisańnia hrant-kantraktaŭ prajšła ŭ Minsku z udziełam Pasła Japonii ŭ Biełarusi i hałoŭnych lekaraŭ balnic, jakija ŭdzielničajuć u prahramie dapamohi, paviedamlajuć «Mocnyja Naviny».
U lik pieramožcaŭ hrantavaha konkursu ŭvajšli Karmianskaja centralnaja rajonnaja balnica i abłasnaja dziciačaja kliničnaja balnica ŭ Homieli. Vydzielenyja srodki nakirujuć na ŭdaskanaleńnie miedycynskaha abstalavańnia lačebnych ustanoŭ.
— Meta prahramy «Karani travy» — dapamoha ludziam, jakija paciarpieli ad avaryi na Čarnobylskaj AES i jaje nastupstvaŭ, — adznačyŭ Pasoł Japonii ŭ Biełarusi Chiroki Takunaha. — Prahrama nie abmiežavanaja tolki miedycynskaj śfieraj. My majem namier pracavać z prajektami taksama ŭ śfierach adukacyi, sielskaj haspadarki i kultury.
Fota BIEŁTA
Jak adznačajecca, Karmianskaja balnica atrymaje hrant u pamiery amal 50,5 tysiačy dołaraŭ dla zakupki ŁOR-ŭstanoŭki. Abłasnoj dziciačaj balnicy vydzielena bolš za 80 tysiač dołaraŭ. Hrošy pojduć na nabyćcio sučasnaha endaskapičnaha abstalavańnia.
Prahrama «Karani travy — hrantavaja dapamoha dla prajektaŭ pa zabieśpiačeńni biaśpieki čałavieka» realizujecca Uradam Japonii z 2004 hoda. Ahulnaja kolkaść padtrymanych u Biełarusi prajektaŭ dasiahnuła 41, suma finansavaj dapamohi — amal 3,4 miljona dalaraŭ.