U Viciebsku asudzili mužčynu, jaki padrabiŭ bolš za 40 siertyfikataŭ ab techahladzie
Sud Pieršamajskaha rajona Viciebska razhledzieŭ kryminalnuju spravu ŭ dačynieńni da žychara horada, jaki padrablaŭ siertyfikaty ab prachodžańni techahladu, paviedamlaje hazieta «Vićbičy». Prysud — hod abmiežavańnia voli z nakiravańniem u vypraŭlenčuju ŭstanovu adkrytaha typu.
Mužčyna trapiŭ u pole zroku milicyi paśla adnaho z DTZ. Pravaachoŭniki, jakija prybyli na miesca avaryi, źviarnuli ŭvahu na stan aŭtamabila adnaho ź jaje ŭdzielnikaŭ. «Mersedes» vidavočna nie padychodziŭ dla ekspłuatacyi. Vyśvietliłasia, što mašyna prajšła lipavy techahlad.
Uładalnik mašyny pryznaŭsia, što skarystaŭsia pasłuhami ŭ asudžanaha. Ad svajho znajomaha mužčyna daviedaŭsia, što złamyśnik dapamahaje prajści techahlad, a taksama ŭ jaho možna kupić falšyvuju nalepku na łabavoje škło. Infarmacyju pra «patrebnaha čałavieka» aŭtamabilisty pieradavali adzin adnamu pa łancužku.
Abvinavačany całkam pryznaŭ vinu. Paviedamiŭ, što ŭ žniŭni 2015 hady pravioŭ techničny ahlad svajho aŭtamabila na dyjahnastyčnaj stancyi ŭ Sianno i atrymaŭ adpaviednyja štampy ŭ siertyfikat.
Doma, kali ŭvažliva razhledzieŭ dakumient, pryjšoŭ da vysnovy, što z dapamohaj kampjutara možna vyrabić padroblenyja štampy «338 Biełtechahlad» i «Biełtechahlad DS 211». Asvoiŭ hetuju praceduru, a zatym i vyrab siertyfikataŭ i nalepak na łabavoje škło. Podpisy za rabotnikaŭ dziaržtechahladu staviŭ sam, prydumlaŭ i prastaŭlaŭ podpisy i supracoŭnikaŭ DAI.
Pierakanaŭšysia, što falšyŭki nie vyklikajuć sumnievaŭ u rabotnikaŭ Dziaržaŭtainśpiekcyi, raspavioŭ pra heta pryjacielam. I da jaho pajšli zakazčyki. Sa žniŭnia 2015 pa śniežań 2016 hoda Babrovič zarablaŭ ad 10 da 50 rubloŭ z kožnaha aŭtamabilista. Strohaha ŭliku nie vioŭ, ale zaznačyŭ, što ŭ jaho było nie mienš za 40 klijentaŭ.
