Daśledčyca z Maskvy śćviardžaje, što ažyćciaviła chałodny jadzierny sintez pry dapamozie bakteryj
Rasijskija navukoŭcy śćviardžajuć, što zdoleli ažyćciavić chałodny jadzierny sintez pry dapamozie žyvych kultur bakteryj, paviedamlaje Kamiersant.
Vynik — pavodle Ały Karniłavaj, kandydata fizika-matematyčnych navuk, dyrektara inavacyjnaha centra fizičnaha fakulteta MDU, dasiahnuty dziakujučy tamu, što ŭ skrajna niespryjalnych dla vyžyvańnia ŭmovach asobnyja mikraarhanizmy zdolnyja sintezavać patrebnyja im jadry z bolš prostych składnikaŭ.
Pakolki isnuje mietad vielmi dakładnaha vymiareńnia kolkaści atamaŭ izatopa žaleza-57, vielmi redkaha ŭ pryrodzie — mietad Miesbaŭera — to dla sintezu byli ŭziatyja bakteryi, jakija patrabujuć žaleza i kisłarodu dla svajho vyžyvańnia — i źmieščanyja ŭ rastvor, što składaŭsia ź ciažkaj dejteryjavaj vady i zakisi marhancu-55, jaki maje na dva nukłony mieniej za hety izatop žaleza.
Jadry dejteryju składajucca jak raz z adnaho pratona i adnaho niejtrona. U hetaj situacyi u bakteryjalnaj kultury jość vybar — sintezavać žaleza, jakoje pryniasie žyćciadajny kisłarod dadaŭšy hetyja dva nukłony da marhancu-55, albo zahinuć.
Jak paviedamlajuć navukoŭcy, u vyniku kala 500 paŭtornych dośledaŭ, u zavisi źjaŭlalisia atamy žaleza, sintezavanyja mikraarhanizmami, što dakazvaje mahčymaść pieraadoleńnia kułonaŭskaha barjeru pry dapamozie chimii žyvych arhanizmaŭ.
Najbolej pierśpiektyŭnymi kirunkami vykarystańnia hetaj technałohii źjaŭlajucca — pavodle jaje tvorcaŭ — sintez redkich izatopaŭ dla miedycyny i chimičnaj pramysłovaści, a taksama paskareńnie dezaktyvacyi zaražanych radyjaktyŭnaściu asiarodździaŭ šlacham sintezu nieradyjaaktyŭnych izatopaŭ z radyjaaktyŭnych.
Jak zajaviła Ała Karniłava, jana ŭžo atrymała niekalki patentaŭ na svaje vynachodnictvy. Jaje pracami siońnia zacikavilisia ŭniviersitety Italii, Francyi i ZŠA. Jana schilajecca abrać dla praciahu pracy Masačusecki technałahičny instytut.
