Sanitar u Niamieččynie spyniaŭ sercy pacyjentaŭ, kab ich paśla reanimavać. Pamierła 97 čałaviek
Sanitara ź Niamieččyny Nilsa Chiohiela abvinavačvajuć u zabojstvie 97 pacyjentaŭ. Jon naŭmysna vyklikaŭ u chvorych spynieńnie serca, kab zatym pasprabavać ich reanimavać. Miedbrat ŭžo asudžany na pažyćciovaje źniavoleńnie, sud adbyvajecca tamu, što znojdzienyja novyja achviary byłoha miedyka, paviedamlaje Nordwest Zeitung.
Fota — Nordwest Zeitung.
Niamieckamu sanitaru Nilsu Chiohielu, jaki prysudžany da pažyćciovaha źniavoleńnia, pradjavili abvinavačańni ŭ zabojstvie 97 čałaviek za toj čas, što jon pracavaŭ u dvuch špitalach na paŭnočnym zachadzie Niamieččyny.
U novych raskrytych vypadkach idzie havorka pra 62 zahinułych pacyjentaŭ u špitali ŭ Delmienchorście i 35 zahinułych u Aldienburhu. Pavodle słovaŭ prakurora, jašče try vypadki byli dosyć padazronymi, ale praviedzienyja testy nie paćvierdzili dadzienych śledstva.
Chiohiel naŭmysna ŭvodziŭ pacyjentaŭ u krytyčny stan, a zatym vykarystoŭvaŭ roznyja miedykamienty dla ich reanimacyi. U listapadzie minułaha hoda prakuratura zajaviła, što Chiohiel moža być datyčny da zabojstva bolš za 100 čałaviek, z tych časoŭ čakałasia aficyjnaje pradjaŭleńnie abvinavačańniaŭ.
Miedbrat z 1999 pa 2002 hod pracavaŭ u klinicy ŭ Aldienburhu i z 2003 pa 2005 hod — u miedustanovie ŭ susiednim horadzie Delmienchorst. U 2015 hodzie Chiohiela prysudzili da pažyćciovaha źniavoleńnia za dva zabojstvy i dva zamacha na zabojstva ŭ Delmienchorście. Adnak na sudzie sanitar sam raspavioŭ, što bolš za 90 pacyjentaŭ paciarpieli ad jaho dziejańniaŭ: jon naŭmysna vyklikaŭ u ich spynieńnie serca, tamu što jamu padabałasia ich reanimavać.
Paśla hetych pryznańniaŭ Chiohiela było praviedzienaje rasśledavańnie i taksikałahičnaja ekśpiertyza dziasiatkaŭ ciełaŭ zahinułych u špitalach ŭ Aldienburhu. Pavodle dadzienych prakuratury, śledčyja vyvučyli bolš za 500 miedycynskich kart pacyjentaŭ i sotni inšych dakumientaŭ u špitalach. Byli ekshumavanyja pareštki 137 čałaviek z 67 mohiłak u roznych častkach krainy.
Data novaha pracesu nad Chiohielem pakul nie pryznačanaja. U Niamieččynie niama śmiarotnaha pakarańnia, tamu novy prysud moža tolki pazbavić Chiohiela mahčymaści atrymać daterminovaje vyzvaleńnie. U Niamieččynie pieršaja takaja prośba asudžanaha na pažyćciovaje źniavoleńnie moža być padadzienaja praz 15 hadoŭ paśla ŭstupleńnia prysudu ŭ zakonnuju siłu.
