Alena Anisim adkazała Rehinie Łastoŭskaj z Pastavaŭ: «Kali Vy siejecie nianaviść i ahresiju, čakajcie adpaviednaj reakcyi»

Voś tekst majho adkazu, nakiravany razam ź listom na imia hałoŭnaha redaktara «SB» 8 studzienia. Na toj momant nie viedała ni imia, ni imia pa baćku sp. Łastoŭskaj, tamu źviartałasia tak, jak było paznačana ŭ materyjale.

Adkaz na list spadaryni R.N.Łastoŭskaj z h. Pastavy

Pavažanaja R.N. Łastoŭskaja z h. Pastavy!

Ja nie znajomaja z Vami asabista, tamu sa ździŭleńniem pračytała Vaš danos (prabačcie, ale na movie prystojnych ludziej takija listy nazyvajucca mienavita tak) u redakcyju haziety «SB».

U svaim liście na imia hałoŭnaha redaktara Vy publična hańbicie aficyjna zarehistravanyja arhanizacyi, jakija dziejničajuć zakonnymi mietadami ŭ miežach, vyznačanych ich Statutami. Nadzvyčaj pakazalna, što Vy čamuści zhadvajecie padziei kanca 1980-ch hadoŭ. Mnie było b zrazumieła, kali b Vy, majučy adroznyja pohlady ci niejkija pretenzii da mianie jak kiraŭnika arhanizacyi, sustrelisia sa mnoj asabista i vykazali ich. Ja čałaviek publičny i adkryty, usie, chto žadaje, źviartajucca da mianie piśmova ci pa telefonie. Pry nieabchodnaści ja vyzdžaju i dla asabistych sustreč niepasredna na miesca.

Nakolki ja razumieju, Vas nadzvyčaj uzrušyła i aburyła navina pra toje, što naša arhanizacyja zajmajecca stvareńniem univiersiteta ź biełaruskaj movaj navučańnia. Dziŭna takoje čuć ad biełaruskaha piedahoha, jaki dekłaruje na słovach kłopat pra patryjatyčnaje vychavańnie moładzi. Jaki ž heta patryjatyzm u dačynieńni da pamiaci našych prodkaŭ, jakija stvaryli admietnuju kulturu, da našych baćkoŭ i dziadoŭ, jakija razmaŭlali pa-biełarusku, stvaryli krainu, šmat achviar i fizičnych sił pakłali na toje, kab adstajać svabodu i niezaležnaść Biełarusi, kali Vy admaŭlajecie maładomu pakaleńniu ŭ pravie atrymać adukacyju na movie svajho naroda, na movie svajoj nacyi? Dziŭnaja ŭ Vas łohika. Kali ŭ Polščy, Francyi, Čechii, Anhlii, Finlandyi, Rasii ŭniviersitety pracujuć na polskaj, francuzskaj, češskaj, anhlijskaj, finskaj, ruskaj movie adpaviedna, to heta narmalna. Kali ŭ Biełarusi pačnie pracavać univiersitet ź biełaruskaj movaj navučańnia, to heta, pa-vašamu, drenna. Dazvolu zadać Vam pytańnie, a moža šmatlikija prablemy, jakija jość u našym hramadstvie, jakraz taki zakanamierny vynik taho, jak my stavimsia da ŭsim zrazumiełych aksijamatyčnych rečaŭ: da našaj kultury, da ahulnačałaviečych kaštoŭnaściej. Bo kali my padmianiajem pavažlivaje staŭleńnie da ŭłasnaj kultury i jaje dziejačoŭ prahinańniem pierad čužoj, časam nie vielmi jakasnaj (asabliva ŭ halinie muzyčnaj kultury), to na kaho my pracujem? Chiba na svoj narod, na svaju krainu? Adkažycie sami dla siabie na hetaje pytańnie biez padmanu, z takoj ža pramatoj, ź jakoj Vy abrynulisia na ŭsich siabroŭ Hramadskaha abjadnańnia «Tavarystva biełaruskaj movy imia Franciška Skaryny».

Nie viedaju, pavažanaja R.N. Łastoŭskaja, sami Vy nadumalisia napisać taki list, ci chtości Vam padkazaŭ ci paprasiŭ. Ale chaču zaznačyć, što ad svaich baćkoŭ ja ćviorda zasvoiła nastupnaje pierakanańnie: piedahoh — heta čałaviek, jaki vychoŭvaje ŭ svaich vučniach dabro, spraviadlivaść, sumlennaść, praŭdzivaść, demanstrujučy heta najpierš svaimi ŭčynkami. Bo skazana, jak Vy chočacie, kab adnosilisia da Vas, tak sami staŭciesia da ludziej. I kali Vy siejecie nianaviść i ahresiju, čakajcie adpaviednaj reakcyi. Ja ž chaču Vam skazać ćviorda: jak by chto ni pieraškadžaŭ biełarusam stać haspadarami va ŭłasnym domie, jamu nie ŭdasca čarhovy raz zapałochać ci pasłabić našy namahańni pa ŭmacavańni dziaržaŭnaści i niezaležnaści našaj krainy. A kali Vy suprać hetaha, to jaki ž Vy patryjot Biełarusi?

Naprykancy nahadaju słovy pieršaha staršyni Hramadskaha abjadnańnia «Tavarystva biełaruskaj movy imia Franciška Skaryny», narodnaha paeta Biełarusi Niła Symonaviča Hileviča:

I ŭsio ž my dojdziem, dojdziem my da Biełarusi!

Staršynia TBM,

Deputat Pałaty pradstaŭnikoŭ

Nacyjanalnaha schodu

Respubliki Biełaruś Alena Anisim

***

Na telehram-kanał «Našaj Nivy» možna padpisacca tut.

0

0

0

0

0

0