Siamja z Mahilova jechała zdymać čary i trapiła ŭ surjoznaje DTZ pad Oršaj: paciarpieli 7 čałaviek
Avaryja adbyłasia 18 studzienia ŭ 10.30 u Aršanskim rajonie, kala vioski Kupiełka (147-y km aŭtadarohi Viciebsk — Homiel — miaža Ukrainy). Sutyknulisia mikraaŭtobus «Falksvahien» i lehkavy aŭtamabil «Micubisi», paviedamili ŭ DAI UUS Viciebskaha abłvykankama.
Za rulom mikraaŭtobusa «Falksvahien» byŭ 55-hadovy žychar Mahilova. Mužčyna nie spraviŭsia z kiravańniem pry zaviaršeńni abhonu.
«Adbyŭsia zanos zadniaj vosi aŭtamabila, i jon vyjechaŭ na sustrečnuju pałasu, dzie sutyknuŭsia z «Micubisi», jakoj kiravaŭ žychar Čašnikaŭ. Na momant avaryi ŭ mikraaŭtobusie było piać čałaviek, u lehkaviku — čatyry. Traŭmy, u asnoŭnym pierałomy, atrymali siem ź ich. Sam kiroŭca mikraaŭtobusa nie paciarpieŭ», raspaviali ŭ DAI UUS Viciebskaha abłvykankama.
Vyśvietliłasia, što kiroŭca busa za minuły hod nie raz pryciahvaŭsia da administracyjnaj adkaznaści za pieravyšeńnie chutkaści. Mužčyna vioz u Viciebsk svaju siamju, kab źniać suroki. U mašynie taksama znachodzilisia dvoje vypadkovych spadarožnikaŭ, jakich kiroŭca znajšoŭ u internecie.