Hałoŭnakamandujučy NATA zaklikaŭ adaptavacca da rasiejskaj pahrozy
Kiercis Skaparoci
Hałoŭnakamandujučy siłami NATO ŭ Eŭropie hienerał Kiercis Skaparoci papiaredziŭ, što Paŭnočnaatlantyčny źviaz nia budzie «daminujučym» u niekatorych abłaściach praź piać hadoŭ, kali nia zmoža madernizavać svaje ŭzbrojenyja siły i adaptavacca da ŭsio bolšaj pahrozy z boku Rasiei, pieradaje «Radyjo Svaboda».
«U mianie, viadoma, jość aściarohi ŭ dačynieńni da Rasiei», — skazaŭ Skaparoci na pres-kanferencyi ŭ Brusieli 17 studzienia paśla sustrečy kiraŭnikoŭ abarony NATO.
Pavodle acenki hienerała, u ciapierašni čas NATO zachoŭvaje svajo daminavańnie. Adnak u niekatorych sferach, u tym liku ŭ kiberprastory, aljans sutyknuŭsia z surjoznymi vyklikami. «Jany vielmi kampetentnyja ŭ hetaj halinie», — skazaŭ jon, majučy na ŭvazie Rasieju. Isnujuć i inšyja sfery, dzie praz madernizacyju my nia budziem praź piać hadoŭ zachoŭvać pieravahu, kali nia zdolejem adaptavacca, zajaviŭ hienerał.
Źviartajučysia da pasiadžeńnia Vajskovaha kamitetu, samaha vysokaha vajskovaha viedamstva aljansu, Skaparoci zajaviŭ, što «adradžeńnie Rasiei jak stratehičnaha kankurenta, usio bolšaja zaniepakojenaść i niestabilnaść u Afrycy i na Blizkim Uschodzie, a taksama teraryzm pierabudoŭvajuć naša stratehičnaje asiarodździe».
Adnosiny pamiž Maskvoj i Zachadam surjozna sapsavalisia paśla zachopu Rasiejaj Krymu ŭ sakaviku 2014 hodu i padtrymki separatystaŭ, jakija kantralujuć častku ŭschodniaj Ukrainy. Z krasavika 2014 hodu ŭ kanflikcie na ŭschodzie Ŭkrainy zahinuli bolš za 10 tysiač čałaviek. Na fonie rostu napružanaści NATO aktyvizavała svaju prysutnaść u krainach-siabrach, jakija źjaŭlajucca susiedziami Rasiei.
