Kryk dušy nastaŭnikaŭ Minščyny: «Nočču piedahoh pavinien spać, a nas prymušajuć patrulavać vulicy»
U redakcyju «Našaj Nivy» pryjšoŭ list ad nastaŭnikaŭ z Salihorska, u jakim jany skardziacca na vymušanuju «sistematyčnuju adpracoŭku vulic i daroh ŭ načny čas».
Z metaj «aktyvizacyi hramadstva suprać nieŭłaścivych funkcyj piedahohaŭ» nastaŭniki prosiać apublikavać adzin z płanaŭ dla piedahohaŭ Minskaj vobłaści, jaki padrabiazna raśpisvaje ich pracu padčas zimnich kanikuł z 20 śniežnia 2017 hoda da 8 studzienia 2018 hoda.
Niekatoryja punkty z kompleksnaha płana mierapryjemstvaŭ «Biaśpiečnyja kanikuły» ŭ pieryjad z 20.12.2017 pa 08.01.2018 hh.
Kompleksny płan mierapryjemstvaŭ «Biaśpiečnyja kanikuły», zaćvierdžany namieśnikam staršyni Minabłvykankama Viktaram Sirenkam, uklučaŭ u siabie jak zvyčajnyja prafiłaktyčnyja vystupy na temu zakanadaŭstva, praviadzieńnie pasiadžeńniaŭ siamiejnych kłubaŭ (nakštałt dyskusii «Dzietki ŭ piŭnoj kletcy»), zabieśpiačeńnie manitorynhaŭ žyllova-bytavych umoŭ, tak i abaviazki na poźni čas, jakija nie padabajucca nastaŭnikam bolš za ŭsio.
A mienavita — udzieł u nastaŭnicka-baćkoŭskich patrulach u viečarovy i načny čas z naviedvańniem miescaŭ kancentracyi niepaŭnaletnich (dyskateki, kłuby, abjekty hramadskaha charčavańnia i inšyja), a taksama vulic i daroh, kab vyjaŭlać tam parušeńni PDR dziećmi.
Taksama nastaŭniki nie razumiejuć, čamu jany pavinny arhanizoŭvać masavaje naviedvańnie chakiejnych matčaŭ.
«U pieduniviersitetach nas nie vučyli adpracoŭvać vulicy i darohi ŭ načny čas, a taksama prymusova zahaniać dziaciej na chakiejnyja matčy, jak patrabuje dadzieny dakumient. Akramia taho, abaviazak nastaŭnika — vučyć, a nočču — spać, kab ranicaj znoŭ vučyć z novymi siłami i viedami. Zarobki ž nastaŭnik atrymlivaje za zaniatki. Za pracu ŭ načny čas u hramadskich miescach i na vulicach atrymlivajuć pradstaŭniki zusim inšych prafiesij»,
— aburajucca piedahohi, jakija, na žal, nie pakinuli źviestak dla zvarotnaj suviazi, kab my mieli mahčymaść źviazacca ź imi i vyśvietlić dadatkovyja akaličnaści.
Ale płan realna isnuje. Baćkoŭska-nastaŭnickija patruli na dyskatekach i ŭ inšych zabaŭlalnych miescach — heta ŭžo nie navinka ŭ mietadach pracy sa školnikami. Novyja abaviazki pryrastajuć — i nastaŭniki, jak bačna, hnievajucca.
A što dumajuć pra takuju reakcyju na ich płany pracy pradstaŭniki ŭpraŭleńnia adukacyi Minabłvykankama?
U adździele sacyjalnaj i vychavaŭčaj pracy nam adkazali nastupnaje:
«Płan mierapryjemstvaŭ «Biaśpiečnyja kanikuły» rekamiendavany, prymusovaści ŭ hetym rasparadžeńni nie było. Nastaŭnicka-baćkoŭskija patruli byli, jość i zastajucca, ale heta nie načny čas, a da 22—23-j hadziny, jany ŭvachodziać ŭ kompleks vychavaŭčych mierapryjemstvaŭ, i nie tak užo časta davodzicca ich naviedvać.
Na darohach ža dziažuryć nichto doŭha nie patrabavaŭ — tam u asnoŭnym pracujuć kiraŭniki ŭstanoŭ adukacyi. Ja taksama była nastaŭnicaj i adčuvała adkaznaść za dziaciej u hety čas, tamu kali treba było iści ŭ patrul — išła. Heta našy abaviazki, jak by emacyjna ni reahavali na heta niekatoryja piedahohi. Ale prymusu ŭ takich płanach nie było i niama — niuansy ich vykanańnia kiraŭnictva škoł uzhadniaje z nastaŭnikami na miescy», — prakamientavała «NN» namieśnik načalnika adździeła Iryna Sadoŭskaja.
