Biełaruskaja davajennaja kniha na internet-aŭkcyjonach: Bahuševič za $400, Kołas — amal za $100
Sapraŭdnyja skarby dla biblijafiłaŭ možna znajści nie tolki ŭ bukinistach, ale i na internet-aŭkcyjonach. Praŭda, časam ceny na knihi tam u dziasiatki razoŭ pieraŭzychodziać realnyja. Adnak možna chacia b pabačyć na skanach i zdymkach tyja vydańni. A paśla naviedacca čarhovy raz u dziedaŭskuju chatu, trochi pałazić pa haryščy, kab adšukać taksama niejkija biełaruskamoŭnyja knihi.
Adam Stankievič «Doktar Francišak Skaryna — pieršy drukar biełaruski. 1525—1925»
Vilnia, Biełaruskaje navukovaje tavarystva, 1925 hod
Zachodniebiełaruskaje vydańnie słavutaha biełaruskaha ksiandza pradajecca na biełaruskim aŭkcyjonie. Za knihu aŭtar choča 600 rubloŭ. Kupić možna biez handlu — adrazu. Niahledziačy na toje, što kniha sapraŭdy redkaja, taki košt vielmi vysoki dla vydańnia. Moža, varta pašukać padobnyja knižki na haryščach u susiedziaŭ?
Francišak Bahuševič «Dudka biełaruskaja», «Smyk biełaruski» + davajennaja paštoŭka Bahuševiča vydaviectva F. Alachnoviča
Vilnia, 1930 hod
Heta adzin z samych darahich łotaŭ. Za knihu i paštoŭku pradaviec choča sama mała 800 rubloŭ. Tak, $400! Adnak hety łot užo visić u prodažy bolš za hod i pakul nie znajšłosia achvotnych jaho nabyć.
Hramatyka biełaruskaj movy, 1 tom. Šakal, Žyrkievič
Miensk, 1939 hod
Davajennyja vydańni BSSR taksama ličacca redkimi. Paśla vajny biełaruskich knižak zastałosia nie tak i šmat. Šmat čaho zhareła ŭ vichury vajny ci navat prosta skarystana na samakrutki i skurana.
Startavaja cana padručnika — 18 rubloŭ. Chacia zachavanaść knihi nie vielmi i dobraja.
Hramatyka biełaruskaj movy. 2 tom. Biaznosik, Šakal
Miensk, 1939 hod
Druhi tom padručnika možna kupić za 27 rubloŭ, ale jon trochi ŭ lepšym stanie.
I.Ju. Mickievič «Rabočaja knižka pa biełaruskaj movie»
Miensk, 1932 hod
Za taki padručnik dla kamvuzaŭ, technikumaŭ i inšych zavočnych ustanovaŭ, a taksama dla samastojnaj adukacyi prosiać 30 rubloŭ (biez torhu). Kniha, darečy, u vydatnym stanie, ale heta druhi tom. Pieršaha niama.
Časopis «Sacha»
1913 hod
Pieršy Biełaruski miesiačnik sielskaj haspadarki. Vydańnie, jakoje nadrukavali jašče za carom, pradajecca ciapier za 45 rubloŭ. Na takich časopisach uzhadoŭvalisia pieršyja biełaruskija patryjoty. Adtočvałasia mova.
Anton Łuckievič «Janka Kupała jak prarok adradžeńnia»
Vilnia, 1932 hod
Za hetuju nievialikuju brašuru (10 staronak) pradaviec choča 200 rubloŭ.
Jakub Kołas «Symon-muzyka»
Vilnia, 1928 hod
Za hetaje zachodniebiełaruskaje vydańnie pradaviec choča 195 rubloŭ! Kniha nadrukavanaja ŭ kniharni «Pahonia», i, mahčyma, tamu pradaviec ličyć, što heta hodnaja cana takoha vydańnia.
Časopis «Šlach moładzi»
1934 hod, 3 numary
Za try numary zachodniebiełaruskaha moładzievaha hramadska-palityčnaha i litaraturna-mastackaha časopisa pradaviec choča 100 rubloŭ. Za aŭkcyjonam sočać sama mała 10 čałaviek, ale pakul nie navažvajucca zrabić staŭki.
Janka Kupała «Izbrannyje stichi»
Maskva, 1939 hod
Vieršy ŭ pierakładzie na rasiejskuju movu našaha słavutaha pieśniara pradajucca ŭsiaho za 15 rubloŭ. Kniha pačynajecca ź vierša «Tiebie, naš učitiel» i pryśviačajecca, zrazumieła, Stalinu.
«Zavajujem samy vysoki ŭradžaj bulby», praf. Darožkin, ahranom N. Hłuch
Instytut bijałohii AN BSSR, Miensk, 1936 hod
Za takuju knižku, jakaja vydadziena nakładam u 4000 asobnikaŭ, prosiać 35 rubloŭ. Heta startavaja cana.
M.S. Kacar «Biełaruski narodny arnamient»
Niemahčyma abminuć hetaje paślavajennaje hruntoŭnaje vydańnie 1955 hoda, za jakoje prosiać 224 rubli (biez torhu)! Chacia ŭ 2009-m za takuju knihu ŭ vydatnym stanie prasili $300 na ebay.com.
U knizie šmat raznastajnych malunkaŭ, uzoraŭ i vyjavaŭ. Praŭda, aŭtar papiaredžvaje: treba rabić staŭki tolki paśla abmierkavańnia łota.