Pjany lažaŭ na zimovaj vulicy, chutkaja adviezła jaho damoŭ, a nie ŭ balnicu. Doma mužčyna pamior
Sama historyja adbyłasia amal hod tamu, u lutym 2017 hoda ŭ vioscy Marusieńka (Homielskaja vobłaść).
Ranicaj na vulicy znajšli mužčynu, jaki lažaŭ u śniezie. Vyklikali chutkuju. Pryjechała bryhada sa Žłobinskaj rajonnaj balnicy.
«Paśla pieršapačatkovaha ahladu fielčarka pry adsutnaści abjektyŭnych dadzienych niapravilna ŭstanaviła dyjahnaz i nie vyjaviła prykmiety pieraachaładžeńnia, - paviedamiła Maryja Kryvanohava, aficyjny pradstaŭnik SK pa Homielskaj vobłaści. - Niapravilna acaniŭšy ciažar stanu pacyjenta, abvinavačanaja nia źmierała tempieraturu jaho cieła, nie vykanała hlukamietryju i nie zrabiła elektrakardyjahramu. U metach utojvańnia dapuščanych parušeńniaŭ, u kartu vykliku chutkaj miedycynskaj dapamohi fielčar ŭniesła źviestki, jakija nie adpaviadajuć rečaisnaści: ab pryčynie vykliku, anamnezie zachvorvańnia, ab ahulnym stanie pacyjenta».
Taksama fielčarka napisała, što mužčyna nibyta sam admoviŭsia ad kardyjahramy i špitalizacyi.
U vyniku, mužčynu advieźli dadomu. Fielčarka parekamiendavała znajomamu, kab toj źniaŭ z pjanaha vilhotnuju vopratku i źjechała.
Praź niekalki hadzinaŭ chutkuju iznoŭ vyklikali da mužčyny. Pryjechała taja ž fielčarka. Na hety raz, kab dyjahnastavać śmierć 62-hadovaha mužčyny.
Pačałosia śledstva.
«Pavodle zaklučeńnia ekśpierta śmierć mužčyny nastupiła ŭ vyniku ahulnaha pieraachaładžeńnia arhanizma ad uździejańnia nadzvyčaj nizkich tempieratur. U kryvi pamierłaha znojdzieny etyłavy śpirt u kancentracyi, jakaja adpaviadaje ałkaholnamu apjanieńniu mocnaj stupieni», - paviedamili śledčyja.
Fielčarka vinu nie pryznała.
U vyniku, čaćviarych supracoŭnikaŭ miedycynskaj ustanovy pakarali dyscyplinarna. A fielčarku sudzili, pryznali vinavataj u nienaležnym vykonvańni svaich abaviazkaŭ miedyka. Jana atrymała hod chatniaj «chimii» i štraf 40 bazavych (980 rubloŭ).
