Biarycie na ŭzbrajeńnie 7 niedarahich ajčynnych kaśmietyčnych srodkaŭ, kab pieražyć zimu
Biełaruskaja zima jašče paru dzion tamu była padobnaja, chutčej, na poźniuju vosień ci na viasnu, ale choład macnieje. Maroz, kołki viecier, mokry śnieh, suchaść u pamiaškańniach, pierapady tempieratury — zimoj naša skura sutykajecca ź bieźličču vyprabavańniaŭ. Vałasy elektryzujucca, skura na rukach robicca suchoj… Nižej my raspaviadziom, jak pazbavicca ad usich hetych prablem.
My sabrali 7 niedarahich, ale efiektyŭnych [heta nie rekłama, a pravierany nami top] biełaruskich srodkaŭ ci navat liniejek, što dapamohuć kamfortna pieražyć zimu, jakaja dakładna ŭžo tut.
Zimovy dohlad ad «Viteks»
Fota vitex.by. «Viteks», «Zimovy dohlad».
Hetuju liniejku «Viteks» vyrablaje daŭno. Krem dla tvaru «Abarona ad choładu i marozu» možna paraić amataram aktyŭnaha adpačynku i tym, chto pravodzić šmat času na vulicy. U pryncypie, kali tempieratura apuścicca nižej za minus 15, raić hety krem možna naohuł usim. Z tanalnikami jon naŭrad ci pasiabruje, zatoje tvar sapraŭdy nie budzie łupicca.
Źviarnicie ŭvahu na srodki dla vałasoŭ: šampuń i asabliva kandycyjanier «Zimovy recept dla stomlenych vałasoŭ». I pieršy, i druhi maje cudoŭny pach. Pra adnaŭleńnie vałasoŭ u hetym vypadku ciažka niešta skazać, ale toje, što jany kudy mienš elektryzujucca, — fakt.
A voś na pienu dla vanny «Zimovaja kazka z alejami razmaryna, bierhamota i eŭkalipta» lepš i nie hladzieć, bo jana sušyć skuru. Ad nievialikaj kolkaści srodku ŭtvorycca vielmi šmat pieny, jana hustaja i pachučaja, ale paśla takoha kupańnia dakładna zachočacca nanieści krem. Tamu albo sprabujcie zahadzia niejtralizavać hety efiekt, dadaŭšy ŭ vadu soli dla vanny, albo nie ekśpierymientujcie naohuł.
Maski i pilinhi z kisłotami
Zima — najlepšy čas dla vykarystańnia kisłotnych masak. Jany vydatna ačyščajuć skuru, robiać jaje miakkaj i bliskučaj.
U biełaruskich vytvorcaŭ (asabliva ŭ «Viteks») ciapier jość z čaho vybirać. Treba razumieć, što efiektyŭnaść srodku kankretna dla vas budzie zaležać ad vašaha typu skury. My abrali try srodki.
Fota vitex.by. «Viteks», «Renew skin» (kletačnaje abnaŭleńnie). Maska-eksfalijant dla biezdakornaha koleru tvaru.
U hetaj maski, napeŭna, rekordnaja kolkaść kisłot. Ciažkaja artyleryja! Tvar budzie mocna ščypać, ale vynik vy ŭbačycie paśla pieršaha prymianieńnia: razhładžvaje reljef skury, aśviatlaje čornyja kropki i postaknie.
Fota oz.by. «Modum», Asoba. Maska-eksfalijant dla prablemnaj skury.
Jašče adna vydatnaja maska, bolš padobnaja na hlinianuju z dabaŭleńniem kisłot. Na skuru kładziecca dobra, maje drobnyja abraziŭnyja čaścicy, jakija zamianiajuć skrab.
Naohuł, Asoba — heta cełaja liniejka srodkaŭ z kisłotami, ale maski siarod ich samyja efiektyŭnyja.
Fota belita-bb.ru. «Bielita», «Prateiny maładości Milkline». Lohki pilinh dla tvaru z małočnaj kisłatoj.
Miakki, dalikatny pilinh, jaki pachnie kakosam i vanillu. Padychodzić tym, kamu nie treba aśviatlać postaknie i ŭ kaho suchaja skura. Adrazu vy efiektu nie zaŭvažycie, moža, kali tolki dakranieciesia da tvaru. Ale praz tydzień-dva vykarystańnia skura mianiajecca ŭ lepšy bok.
Kali vy vykarystoŭvajecie srodki z kisłotami, nie zabyvajcie, što pry hetym pavialičvajecca śviatłoadčuvalnaść skury i mohuć źjavicca pihmientnyja plamy. Niekatoryja miarkujuć, što heta tyčycca tolki sałonnych pilinhaŭ, bo srodki, dastupnyja ŭ prodažy, nie takija kancentravanyja. Adnak lepš padstrachavacca i navat zimoj vykarystoŭvać sanskryn (što zaścierahaje ad uździejańnia sonca). Jak minimum, jon źbieraže skuru ad fotastareńnia.
Druhi važny momant: nie zabyvajcie ŭvilhatniać skuru, bo kisłoty mohuć jaje sušyć. Bajki pra toje, što zimoj nielha vykarystoŭvać ŭvilhatnialnyja kremy — mif, ničoha na tvary nie zamierźnie i skuru nie traŭmuje (tempieratura skury nie apuskajecca da nula, i tempieratura srodkaŭ na joj — taksama).
Pra ŭvilhatnieńnie jašče asobna raskažam nižej.
Krem dla tvaru dzionny z mucynam ślimaka ad «Bielita-M»
Pa dziejańni jon padobny na znakamity krem sa ślimakom ad karejskaha brenda «Mizon».
Try ŭ adnym: uvilhatniaje, nasyčaje, uzmacniaje rehienieracyju (a značyć — zmahajecca z postaknie i vuhrami). A jašče mucyn (białok u składzie ślimakovaj ślizi) zmahajecca z marščynami.
Fota belita-m.by.
Hety srodak dobry dla ŭsich uzrostaŭ. Nie źviartajcie ŭvahu, kali sustreniecie na ŭpakoŭcy znak «30+», bo heta tolki parada, a nie abaviazkovaje praviła. Razam z kisłotnaj maskaj taki srodak stanie viernym pamočnikam usim, chto pakutuje ad aknie, niezaležna ad uzrostu.
Z usiaho pieraličanaha tut jon kaštuje najbolš — kala 10 rubloŭ.
Kremy z mucynam ślimaka sieryi BIO HELIX ad «Markieł»
Fota markell.by.
U kampanii «Markieł» liniejka z mucynam ślimaka źjaviłasia prykładna na paŭhoda raniej, čym u «Bielity». Srodki roznyja, ich možna padabrać pad lubyja patreby skury. Znajomstva varta pačać ź dzionnaha kremu. Viersija dla tłustaj skury pa adčuvańniach trochi bolš ščylnaja, čym u «Bielity», ale ŭvilhatniaje i zažyŭlaje taksama dobra.
U ideale pasprabujcie kremy ad dvuch vytvorcaŭ i abiarycie toj, jaki bolš padabajecca.
Darečy, u markiełaŭskaj liniejcy chvalać prajmier dla maciravańnia tvaru. Kali vieryć vodhukam, jon dobra maciruje i padaŭžaje žyćcio makijažu. A jašče prajmiery dadatkova zaścierahajuć skuru pry nizkich tempieraturach.
Tkankavyja maski ad «Łabaratoryi sełfi»
Fota selfielab.by.
Maski — važny elemient dohladu, asabliva zimoj, kali skura byccam stanovicca tančejšaj i patrabuje bolšaj kolkaści srodkaŭ. Tkankavaja maska ŭ takim vypadku budzie vydatnym pamočnikam — heta jakasny ekspres-srodak.
Brend «Łabaratoryja sełfi» vypuskaje tkankavyja maski ŭ niezvyčajnym farmacie. U kamplekcie buduć survetka dla ačyščeńnia ruk, tvaru, ułasna maska i survetki dla źniaćcia jaje reštkaŭ.
Usio heta pryhoža zapakavana ŭ asobnyja kišeńki, kožny etap padpisany. Karystacca takimi maskami zručna, asabliva ŭ padarožžy.
Usiaho ŭ asartymiencie ažno 16 masak! Spačatku biarycie tuju, što spadabajecca pa apisańni. I nie pałochajciesia ŭzrostavych paznak (kali vam 23, a vy vykarystoŭvajecie masku «35+», ničoha strašnaha nie zdarycca).
Asabista mnie bolš za ŭsio padabajecca «FitaKisłarod «Lekavyja travy»».
Tkankavyja maski dla vačej ad «Belkosmex»
Fota belkosmex.by.
Usie, napeŭna, sto razoŭ čuli, što skura vakoł vačej — samaja dalikatnaja, tamu maje patrebu ŭ admysłovym dohladzie. Adnak mienavita zimoj jana moža pačać mocna kapryzić, i tady terminova spatrebicca mocnaje ŭvilhatnieńnie.
Źviarnicie ŭvahu nie tolki na jarkija (ale pry hetym vielmi efiektyŭnyja) maski z kavałačkami sadaviny, ale i na maski ź sieryi «Chatni kaśmietołah». Naprykład, «Antystres. Taniziravańnie i aśviažeńnie» adčuvalna palapšaje stan skury vakoł vačej i zručna nanosicca. A voś narmalna pakłaści kavałački sadaviny (maski z kivi, ahurkom ci kłubnicami) ź pieršaha razu moža i nie atrymacca.
Małačko dla cieła i krem dla ruk ad «Liv Delano»
Fota liv-delano.by.
«Małačko multyaktyŭnaje dla suchoj adčuvalnaj skury cieła» lohka nanosicca, chutka ŭbirajecca, vydatna ŭvilhatniaje i siłkuje skuru (nie tolki suchuju). Małačko idzie z pompaj, dazatar salidny, tamu karystacca im adno zadavalnieńnie.
Fota liv-delano.by.
Uvilhatnialny krem-sarbiet dla ruk (praŭda, nie zusim jasna, čym «sarbiet» adroźnivajecca ad prostaha kremu) taksama ŭbirajecca chutka, pry hetym byccam stvaraje dadatkovuju plonku na rukach. Praz chvilinu vy nie budziecie jaje adčuvać, ale zaŭvažycie, što skura stała bolš pryvabnaj i byccam kryšačku vaskovaj. Sarbiet vydatna adnaŭlaje skuru ruk paśla choładu ci myćcia posudu.
Biełaruskija vytvorcy rehularna radujuć navinkami, adnak dla hetaj padborki my abrali tolki pravieranaje i daŭno lubimaje. Raskažycie ŭ kamientarach, čym z hetaha vy karystalisia, što vam spadabałasia, a što, naadvarot, nie padyšło?
