Mark Cukierbierh abiacaje chutkija reformy ŭ fejsbuku
Zasnavalnik fejsbuka Mark Cukierbierh abvieściŭ płany źmienaŭ u sacsietcy ŭ najbližejšy čas. Pavodle jaho, administratary pačuli skarhi karystalnikaŭ na toje, što kamiercyjny i arhanizacyjny kantent pačaŭ zanadta vyciaśniać pryvatnyja pasty i pieraškadžaje ludziam kamunikavać mižsobku, paviedamlaje BBC.
Jon taksama dadaŭ, što stvaralniki fejsbuka adčuvajuć adkaznaść za toje, kab karystalniki nie tolki pasiŭna prahladali stužku ŭ zabaŭlalnych metach. Šlacham stvareńnia metavych hrup, aryjentavanych na akreślenyja typy kantentu, administracyja sacsietki budzie namahacca aktyvizavać karystalnikaŭ u abmienie infarmacyjaj.
«Kali hetyja źmieny zapracujuć, vy pačniecie bačyć mieniej publičnaha kantentu, naprykład — publikacyj ad firm, brendaŭ i ŚMI. Uvieś publičny kantent budzie standartyzavany — i heta pavinna spryjać źmiastoŭnamu ŭzajemadziejańniu ludziej», — skazaŭ Mark Cukierbierh.
Jon spadziajecca, što ludzi pačnuć pravodzić u fejsbuku mieniej času, ale hety čas budzie vykarystany bolš intensiŭna dla ŭzajemadziejańnia ŭ ramkach refarmavanych metavych hrup. Źmieny, pavodle jaho, pavinny zapracavać užo ciaham najbližejšych tydniaŭ.
Raniej stvaralnik sacsietki taksama anansavaŭ, što jaje administracyja budzie bolš aktyŭna supraćstajać sprobam z boku «nacyjanalnych dziaržaŭ manipulavać kantentam», i abiacaŭ pieradać Kanhresu ZŠA infarmacyju, źviazanuju z bolej čym 3000 palityčnych rekłam, raźmieščanych u fejsbuku afilijavanymi z ŭradam pradstaŭnikami Rasii.
