U Isłandyi buduć štrafavać kampanii, jakija płaciać žančynam mienš
U Isłandyi ciapier zakonam zabaroniena płacić žančynam mienš, čym mužčynam za tuju ž pracu, paviedamlaje currenttime.tv.
U studzieni 2018 u Isłandyi ŭstupiŭ u siłu pieršy ŭ śviecie zakon ab roŭnaj apłacie pracy dla mužčyn i žančyn za adnolkavuju pracu. Pavodle novaha zakona, z hetaha času kampanii, u jakich pracujuć bolš za 25 čałaviek, abaviazany prachodzić śpiecyjalnuju siertyfikacyju i paćviardžać, što jany prapanujuć roŭnuju apłatu dla mužčyn i žančyn na adnolkavych pazicyjach.
Kali kampanii buduć parušać zakon abo spoźniacca z prachodžańniem siertyfikacyi, na ich mohuć nakładvacca štrafy, suma jakich budzie ŭzrastać štodnia. Štraf, u zaležnaści ad rašeńnia suda, moža dasiahać 50000 isłandskich kron za dzień, heta kala $480. Aproč inšaha, zakon uvodzić bolš žorstkija patrabavańni da praduchileńnia damahańniaŭ i dyskryminacyi na pracoŭnym miescy.
Całkam pazbavicca ad hiendarnaj roźnicy ŭ apłacie Isłandyja płanuje da 2022 hoda.
Isłandyja ŭžo niekalki hadoŭ zapar zajmaje pieršaje miesca ŭ hłabalnym indeksie hiendarnaj roŭnaści, jaki štohod z 2006-ha publikuje Suśvietny ekanamičny instytut.
U 2017 hodzie ŭ jaho ŭklučany 144 krainy. Usie jany vybudavany pa źmianšeńni indeksa roŭnaści. Jon vyznačajecca ad nula da adzinki, dzie nul aznačaje biaspraŭje adnaho z połaŭ, a adzinka — poŭnuju roŭnaść.
U piaciorku samych raŭnapraŭnych krain uvajšli:
- Isłandyja (1 miesca)
- Narviehija (2 miesca)
- Finlandyja (3 miesca)
- Ruanda (4 miesca)
- Šviecyja (5 miesca)
U kancy śpisu akazalisia:
- Iran (140 miesca)
- Čad (141 miesca)
- Siryja (142 miesca)
- Pakistan (143 miesca)
- Jemien (144 miesca)
