Žycharka Salihorska śćviardžaje, što mašyna DAI źbiła jaje na pierachodzie
Žycharka Salihorska Volha Šarydoda siońnia, 2 studzienia, znachodzicca na balničnym łožku. Jana raspaviała abw.by, što ranicaj 29 śniežnia jaje na piešachodnym pierachodzie źbiŭ słužbovy aŭtamabil DAI.
Pa słovach Volhi, miedyki pastavili joj dyjahnaz «zakrytaja čerapna-mazhavaja traŭma, strasieńnie mazhoŭ, udary noh».
Usio heta jana atrymała paśla taho, jak jaje źbiŭ aŭtamabil DAI i jana ŭpała na prajeznuju častku. Ciapier Volha prachodzić lačeńnie.
Volha raspaviała: «Ranicaj 29 śniežnia ŭ 7.50 u horadzie Salihorsku, pierakanaŭšysia ŭ biaśpiecy, pačała pierachodzić darohu. Tam nierehulavany piešachodny pierachod na davoli šyrokaj vulicy Lenina ŭ rajonie doma 36 kala mahazina Ziko. Pierachod niadrenna aśviatlajecca. Ja paśpieła pierajści tolki adnu pałasu, jak była źbitaja patrulnaj mašynaj DAI. Ad sutyknieńnia było raźbitaje łabavoje škło z boku pasažyra.
Mianie padniali, ahledzieli i pasadzili ŭ mašynu.
U aŭtamabili inśpiektar znachodziŭsia adzin. Chutkuju jon nie prapanavaŭ vyklikać — kryvi nie vidać, ruki-nohi cełyja, zatoje vyklikaŭ kalehu pa adździele. Zamiery i ŭsio inšaje byli zroblenyja vielmi chutka».
Volha śćviardžaje, što śviedak DTZ navat i nie sprabavali zapisać, choć takich było šmat. «Na fota nie vidać, ale ŭ hety čas u arcy stajali mašyny, ludzi jechali na pracu. Paśla mianie zavieźli ŭ pryjomny pakoj i syšli. Tolki chvilin praz 10—15 lekar zaprasiŭ mianie ŭ kabiniet.
Chutka pryjechała načalstva DAI, niešta tam pastajali i tak ža chutka źnikli, nichto nie spytaŭ pra majo samaadčuvańnie. Dalej supracoŭniki DAI zaviali ŭ kabiniet. Lekar pačaŭ ahlad, apytańnie. Supracoŭniki syšli, a mianie nakiravali ŭ palikliniku da nieŭrapatołaha.
I dalej pačałosia majo chadžeńnie pa kabinietach. U nieŭrapatołaha vyśvietliłasia, što ad pačatku ŭ pryjomnym pakoi ŭ kartcy mnie napisali, što ja išła i rezka ŭpała, tamu i było admoŭlena ŭ MRT. Kali siadzieła pad kabinietam, patelefanavała ŭ DAI i skazała, što tak nie robicca, maŭlaŭ, vy mianie pryvieźli i kinuli. Na što mnie adkazali, što zaraz pryjedzie supracoŭnik. Pryjechaŭ jon, kali ŭsie kabiniety ja ŭžo prajšła.
U pryjomnym pakoi nie paličyli patrebnym pakłaści ŭ balnicu na abśledavańnie. Paśla inśpiektar dastaviŭ mianie ŭ DAI, tut skłali pratakoł zdareńnia. Uvieś hety čas (da pryjezdu chutkaj) sa mnoj znachodziłasia kaleha, jaje taksama apytali.
Paśla DAI pajšła na pracu (u kartcy ŭ mianie było napisana «pracazdolnaja»), dzie straciła prytomnaść. Kalehi vyklikali chutkuju, ja była špitalizavana, mianie pakłali ŭ špital na abśledavańnie.
Ciapier nie viedaju, što mnie rabić. Jašče na pracy paśpieli skłaści zvarot u salihorskuju prakuraturu, spadziajusia, tam raźbiarucca».
Kamientar z nahody taho, što adbyłosia, abw.by atrymaŭ u DAI Minskaj vobłaści.
Tam paviedamili nastupnaje:
— 29 śniežnia kala 7 hadzin 50 chvilin kiroŭca słužbovaha aŭtamabila DAI Salihorskaha RAUS Opel Astra ździejśniŭ najezd na žančynu-piešachoda. Miascovaja žycharka 1986 hoda naradžeńnia pierasiakała vulicu Lenina pa piešachodnym pierachodzie, što sprava naleva pa adnosinach da aŭtamabila.
Paciarpiełaja apieratyŭna była dastaŭlena ŭ balnicu. U miedycynskaj ustanovie pa vynikach abśledavańnia pastaŭleny dyjahnaz «udary, hiematoma, stan ałkaholnaha apjanieńnia lohkaj stupieni». Za rulom słužbovaha aŭtamabila znachodziŭsia supracoŭnik adździeła DAI Salihorskaha RAUS 1974 hoda naradžeńnia. DTZ adbyłosia ŭ ciomny čas sutak na aśvietlenym učastku darohi. Stan prajeznaj častki — mokry asfalt. Supracoŭnik DAI znachodziŭsia na słužbie, prajšoŭ ahlad na stupień fizičnaha stanu ŭ miedycynskaj ustanovie.
Pa dadzienym vypadku UUS Minskaha abłvykankama pravodzić pravierku, paśla zakančeńnia jakoj buduć dadzieny pravavyja acenki DTZ.
P.S. Aznajomiŭšysia z adkazam DAI, Volha adznačyła, što «tak, u pryjomnym pakoi traŭmatołah daŭ mnie dychnuć u niejki prybor. Ale źviestki nidzie nie zafiksavany, ja ničoha nie padpisvała… Kali piešachod pierachodzić darohu, vykonvajučy PDR, pa pierachodzie, jakaja roźnica, u jakim stanie jon znachodzicca?»
