Chto čytaŭ «Našu Nivu» ŭ 2017-m: statystyka. I trochi novaŭviadzieńniaŭ
U internecie statystyka prahladaŭ vielmi dakładnaja. Što ž nam pakazvaje Google Analytics adnosna nn.by?
Za 2017 hod u paraŭnańni z 2016-m ahulnaja kolkaść naviednikaŭ «Našaj Nivy» vyrasła na 10,3% da 4,49 miljona. Kolkaść sieansaŭ-naviedvańniaŭ u nas vyrasła na 13,8% da 15,8 miljona. A kolkaść prahladaŭ — na 12% da 89 miljonaŭ.
Heta vysokija tempy rostu, kali ŭličyć, što sama aŭdytoryja internetu ŭ krainie ciapier raście ŭsiaho na niekalki pracentaŭ za hod. Heta značyć, naša koła pašyryłasia.
Adznačajem, što kala 21% pierachodaŭ usich naviedvańniaŭ — heta pierachody z sacyjalnych sietak. Zdarovy pakazčyk.
Pa ličbie prahladaŭ «Naša Niva» vyjšła na 3-je miesca ŭ Biełarusi siarod usich infarmacyjnych partałaŭ. My dakazali: biełaruskamoŭny partał moža na roŭnych kankuravać z rasiejskamoŭnymi.
My budziem i nadalej zmahacca za tuju aŭdytoryju, jakaja raniej pa-biełarusku nie čytała. Bačym u hetym vialikuju metu. Toj, chto čytaje «Našu Nivu», toj užo žyvie ŭ biełaruskim śviecie.
My taksama patrochu-pacichu pašyrajem tematyčny absiah. Uvažlivy čytač prykmieciŭ, jak u 2017-m vyrasła ŭ nas, naprykład, kolkaść publikacyj na temy technałohij, a taksama dadałasia «Naša Nina». Nichto takoha pa-biełarusku nie rabiŭ da nas! Jak pa-mojmu, źjaŭleńnie takoha vydańnia na rodnaj movie — maleńki kulturny cud.
U 2018 hodzie my zapuścim NN-Afišu — kab vy mahli płanavać svoj volny čas, nie pierachodziačy na rasiejskamoŭnyja sajty. I na hetym nie spynimsia — buduć i siurpryzy.
Jašče važny momant. Prosim pryjazna ŭsprymać rost kolkaści rekłamnych i partniorskich publikacyj. Vy majecie mahčymaść čytać pa-biełarusku, atrymlivać abjektyŭnuju infarmacyju, dziakujučy kamiercyjnamu kantentu. Rost dachodaŭ ad rekłamy nie prosta dazvolić nam pisać i zdymać bolš, tolki jon daść mahčymaść pavyšać standarty.
U 2017-m my zrabili šerah važnych rasśledavańniaŭ, a ŭ apošni čas, jak vy, mabyć, zaŭvažyli, vyrasła kolkaść vialikich, śpiecyjalnych artykułaŭ.
«Naša Niva» roźnicca ad mnohich inšych vydańniaŭ tym, što heta partał svaich čytačoŭ. My publikujem za hod tysiačy dasłanych vami navin, fota, videa, rekamiendavanych vami zapisaŭ z sacsietak. My idziom nasustrač vašym prośbam, navat koštam ryzyki i pamyłak. My budziem pavyšać standarty navat u drabnicach pracy ź infarmacyjaj. Tak, z 1 studzienia my ŭviali dla siabie praviła, što ŭsie faktyčnyja praŭki ŭ artykułach, uniesienyja paśla publikacyi, buduć paznačacca ŭ kancy materyjału — bo heta stvarała časam sprečnyja momanty.
Z nami spračajucca, my paroju vyklikajem vostryja emocyi, ale nas nie ihnarujuć ni tut ni tam, ni tyja ni hetyja. Pamyłki zabuducca, pryncypovaje zastaniecca: biełaruskaje koła pryrastaje, a nie zamykajecca ŭ sabie.
Čytajcie taksama: «Naša Niva» i jaje pazicyja ŭ procistajańni libierałaŭ i kansiervataraŭ
