Pratesty ŭ Iranie: dziaržaŭnaje telebačańnie krainy paviedamiła pra 13 zabitych
Fota EPA.
Niahledziačy na pahrozy z boku siłavikoŭ i zakliki da dyjałohu ad prezidenta krainy Chasana Raŭchani, u niadzielu ŭ Iranie praciahvalisia burnyja pratesty suprać biednaści i dyktatury.
Demanstracyi adbylisia ŭ dziasiatku haradoŭ u roznych rehijonach krainy. Vystupy pieraraśli ŭ sutyčki z tak zvanymi «Vartaŭnikami isłamskaj revalucyi». Dziaržaŭnaje telebačańnie, jakoje raniej pratesty zamoŭčvała, paviedamiła pra 13 zabitych.
Papularny łozunh pratestaŭ — heta «Śmierć dyktataru». Havorka idzie pra ajatału Chamieniei.
Niepasrednaj nahodaj dla pratestaŭ staŭ rost cenaŭ na bazavyja pradukty charčavańnia. Adnak na vulicach amal adrazu zahučali palityčnyja łozunhi. Demanstranty patrabujuć adstaŭki prezidenta Raŭchani i źmieny sistemy.
Iran — zakrytaja kraina, isłamskaja teakratyja. U Iranie adzinaja ŭ svaim kštałcie palityčnaja sistema: adbyvajucca kankurentnyja vybary, abirajuć parłamient i prezidenta, ale kančatkovaje słova pry hetym zastajecca za šyickim duchavienstvam.
Učora ŭ Iranie byŭ zabłakavany dostup da Instahrama i Telehrama. Ale heta nie spyniła pratestoŭcaŭ.
U Iranie Telehram — samy papularny mesendžar. Ličycca, što im karystajecca da pałovy nasielnictva.
Mienavita Telehram byŭ vykarystany, kab sklikać ludziej na demanstracyi pratestu. Pieršaja adbyłasia ŭ Miešchiedzie 28 śniežnia. Infarmacyja pra jaje imhnienna raspaŭsiudziłasia pa ŭsioj krainie, i 29 i 30 śniežnia manifiestacyi spałachnuli ŭžo ŭ troch dziasiatkach haradoŭ.