«Ščaście razdajuć!» — jak biełarusy nabyvajuć kvatery, dziela jakich dva tydni načavali na marozie
Praciahvajecca prodaž kvater u domie ŭ staličnym rajonie Navinki. Nievysokija ceny ($620 za mietr) pieratvaryli prodaž u sapraŭdnaje realici-šou. Praŭda, chutčej sumnaje, čym viasiołaje.
Miesiac tamu źjaŭleńnie ŭ prodažy tannych kvater u stalicy skončyłasia skandałam. Minčukoŭ, jakija samaarhanizoŭvalisia i čakali ŭ čerhach pa niekalki hadoŭ, pasunuli tyja, chto prosta pryjšoŭ i stvaryŭ žyvuju čarhu niepasredna na hanku Upraŭleńniem kapitalnaha budaŭnictva Centralnaha rajona.
19 śniežnia na prodaž vystavili jašče 39 kvater. Ale ciapier tyja, chto vioŭ śpisy, uvohule nie pryjšli. A žyvaja čarha, pa słovach pakupnikoŭ, pačała farmiravacca až za 2 tydni da dnia prodažu.
Ranicaj 19 śniežnia pad dźviaryma UKB staić natoŭp. Ahułam čałaviek 50-60: u doŭhačany dzień prodažu mnohija prychodziać siemjami. Ludzi kažuć: «Čamu tak šmat narodu? A heta hrupa padtrymki».
Uvieś čas, pakul budučyja pakupniki čakali na hanku, kala ich dziažuryli nievialikija «atrady» z mužčyn — na ŭsiaki vypadak. Mahčymaść kupić novaje žyllo ŭ stalicy amal na 20 tysiač tańniej za rynkavyja košty vypadaje redka, i ludzi byli hatovyja adstojvać jašče nie apłačanyja, ale ŭžo «svaje» kvadratnyja mietry.
Ale kali jašče za dzień da pačatku prodažu adčuvałasia niervovaść, to ŭžo 19 śniežnia natoŭp byŭ nastrojeny bolš pazityŭna.
«Nu prosta my 2 tydni na marozie dziažuryli, voś ludzi i šaleli, - tłumačyć adna z žančyn. La dźviarej UKB — jaje muž. Para źbirajecca nabyvać dvuchpakajoŭku.
«Ja i sama stajała tut, mianialisia z mužam — pa 12 hadzin. Mašyna była, ale doŭha ŭ joj nie pasiadziš, raptam chto pryjdzie ŭ čarhu», — kaža žančyna.
Ale kali kvater usiaho tolki 39, navošta tut stolki narodu?
«My hruppa padtrymki» ci «My — maržy, hartujemsia», — koratka i nieachvotna adkazvajuć zamiorzłyja mužčyny. Niekalki čałaviek navat stanoviacca naŭprost pierad hankam i sčaplajuć ruki, nibyta čakajučy šturmu, ale darma — nichto praryvacca nie źbirajecca, siońnia tut usie svaje.
«My pakul siadzieli pad dźviaryma hetyja dni, navat pasiabravali, - paśmichajecca adna z žančyn. — Niekatoryja ščyra pryznavalisia, što buduć nabyvać 2 kvatery — nu i ładna, što ž zrobiš. Ale takich nie šmat, čałavieki 3-4».
Ciapier zrabili vysnovy i ŭ UKB. Pradstaŭnik ustanovy pierad tym, jak zapuskać ludziej, vyjšaŭ na hanak, patłumačyŭ, što zapuskajuć pa adnym klijencie, paśla achoŭnik vyvodzić čałavieka i zaprašajuć nastupnaha. Dla dakładnaści va UKB pieradali śpis tych, chto stajaŭ u čarzie.
Navinu pra toje, što «pieršy pajšoŭ!», natoŭp sustrakaje ŭśmieškami i apładysmientami.
«Ščaście razdajuć! — śmiajecca adzin z mužčyn. — Za našyja ž hrošy!»
Praŭda, navat ščaślivyja i zadavolenyja ludzi, jakija vychodziać z UKB, kamientavać ničoha nie chočuć. «Dvuchpakajoŭku ŭziała, 67 mietraŭ!» — radasna paviedamlaje svajakam žančyna, jaje abdymajuć svajaki. Adnak z žurnalistami budučyja žychary Navinak vyrašajuć usio ž nie havaryć.
Pakul na hanku UKB ludzi z natoŭpu radujucca adzin za adnaho i nieciarpliva čakajuć svajakoŭ, jakich adpravili pisać zajavu, la čornaha ŭvachodu ŭ budynak dziažuryć adzinoki małady čałaviek. Pradstaŭlajecca Sašam.
«Ja kvateru nie atrymaju, nie było mahčymaści ŭ hety raz dziažuryć u čarzie. A tut, pad čornym uvachodam, ja staju z pryncypa — nie chaču, kab chtości atrymaŭ na chalavu chatu. Bo ŭ minuły raz ja sam bačyŭ, jak hetyja dźviery adkryli, zapuścili dvaich biez čarhi i paśla ludziam nie chapiła kvater, — śćviardžaje Saša.
Sašu 25 hadoŭ, u jaho 3-miesiačnaje dzicia. Jon płanuje ŭ nastupny raz pasprabavać nabyć kvateru ŭ Navinkach. A pakul što chłopiec dzielicca svaimi mierkavańniami.
«Śpisy — nielehalnyja. Sprava z hetymi śpisami ŭvohule dajšła da milicyi, da ABEZu — bo jak jany daviedvalisia pra prodaž kvater, raniej, čym jaho abviaščali? — zadajecca pytańniem Saša. — Uvohule ŭ nas prablemy z zakanadaŭstvam. Kali ŭ krainie prablemy z žyllom, z koštami na rynku, to čamu nie ŭvieści zakon — nabyŭ kvateru i ŭsio, u nastupnyja 5 hadoŭ nie maješ prava nabyć druhuju. Ja b padtrymaŭ takoje rašeńnie — bo pierakupščykaŭ mašynaŭ zakanadaŭča abmiažoŭvajuć. Čamu nie abmiežavać pierakupščykaŭ žylla?»
