Najlepšaje biełaruskaje kino hetaha hoda — u adnym sieansie 17 śniežnia
17 śniežnia, u Dzień biełaruskaha kino, kinateatr «Pijanier» pakaža 7 karotkamietražnych filmaŭ biełaruskich režyseraŭ-udzielnikaŭ sioletniaha kinafiestyvalu «Listapad». U prahramu ŭvajšli stužki Ułady Siańkovaj, Dźmitryja Dziadka, Neli Vasileŭskaj, Sašy Ścielčanka, Lizaviety Rydvan i film Julii Rudzickaj «I poŭnia stała», jaki staŭ najlepšaj animacyjnaj karcinaj Nacyjanalnaha konkursu «Listapad». Pra filmy raskažuć zdymačnyja hrupy. Pačatak pakazu a 16-j.
Film «From a Great Height» (pieršapačatkovaja nazva «Paranoid Android») Ułady Siańkovaj raspaviadaje pra toje, jak źbieh abstavinaŭ zvodzić siryjcaŭ i biełarusa ŭ ciahniku na Varšavu. Heta nie pieršaja karotkamietražnaja praca Ułady, u 2015 hodzie «Listapad» pakazaŭ jaje film «Biełaruś jakaja». A jaje poŭnamietražny debiut «Hraf u apielsinach», źniaty dva hady tamu, atrymaŭ Discovery Award na kinafiestyvali ŭ Kotbusie (Hiermanija), dypłom «Za śmieły i śviežy pohlad» na «Listapadzie-2016», a taksama ŭziaŭ udzieł u Maskoŭskim mižnarodnym kinafiestyvali.
«Sumlenny pohlad» Dźmitryja Dziadka raspaviadaje pra žyćcio maładoha režysiora, jaki zdymaje film, hałoŭny hieroj jakoha — niešta siaredniaje pamiž Daniłam Bahrovym ź filma «Brat» i hierojem «Stałkiera» Tarkoŭskaha. Aŭtar hetaha iranična «kino pra kino», jaki vyklikaŭ jarkija emocyi ŭ hledačoŭ «Listapada», Dźmitryj Dziadok — adzin z samabytnych maładych aŭtaraŭ, paśpiachova pracuje i ŭ ihravym ( «Nieviadomy mužčyna»), i ŭ dakumientalnym ( «Pamiž niebam i ziamloj») kiniematohrafie.
Nastupny film prahramy Dnia biełaruskaha kino — «Siabry pa pierapiscy» Neli Vasileŭskaj. Anton i Liza znajomyja ŭžo hod, jany zakachany adzin u adnaho, ale kamunikujuć vyklučna praz sacyjalnyja sietki, bo žyvuć u roznych haradach. Anton advažvajecca pryjechać da Lidy z Maskvy ŭ Minsk, kab sustrecca ŭ realnaści. Neli Vasileŭskaja — małady biełaruski režysior, na rachunku jakoj užo kala dziesiaci karotkamietražnych filmaŭ, nieadnarazova była ŭdzielnikam i pryzioram kinafiestyvalaŭ u Biełarusi, Rasii, Ukrainie, Polščy, Kazachstanie, Hiermanii.
Jašče adzin film prahramy — «Imitacyja» Sašy Ścielčanki, studenta Pražskaj akademii vyjaŭlenčaha mastactva. Alena, jakaja pracuje ŭ Čechii chatniaj haspadyniaj, upeŭniena: kali jana budzie z Tomašam, jaje čakaje vydatnaja budučynia. Svajo sacyjalnaje stanovišča jana ŭsprymaje jak pieraškodu. Niaŭpeŭnienaść u sabie i pačućcio nieabaronienaści prymušajuć jaje chavać praŭdu i vieści padvojnaje žyćcio.
Film «Tramvaj» Lizaviety Rydvan raspaviadaje historyju maładoha čałavieka, jaki zakachaŭsia ŭ dziaŭčynu svajho brata. Heta karcina pra nieparazumieńnie ŭ siamji, niaŭvažlivaść da blizkich i pra adzinotu. «Tramvaj» — debiutnaja rabota Lizaviety, ciapier jana vučycca ŭ UDIK imia S. A. Hierasimava (majsternia Siarhieja Sałaŭjova).
U prahramu ŭvajšoŭ taksama adzin animacyjny film — rabota Julii Rudzickaj «I poŭnia stała», u jakim paśpiachova spałučajucca falkłor, mistyka i najvyšejšy ŭzrovień animacyi. Karcina Julii zavajavała ŭznaharodu Nacyjanalnaha konkursu «Listapad» jak najlepšy animacyjny film, a taksama šmatlikija pryzy festaŭ pa ŭsim śviecie.
