Padčas dziciačaha chakiejnaha matča adbyłasia bojka z udziełam Koli Łukašenki
Partał Tut.by apublikavaŭ vialiki artykuł pra anturaž finalnaha matča ŭ minskim adboračnym turniry «Załatoj šajby» pamiž «Miadźviedziami» i «Hryfonami».
«Hryfony» — kamanda, u jakoj hulaje 13-hadovy Kola Łukašenka, syn kiraŭnika krainy. Za dźvie chviliny da kanca matča adbyłasia bojka ź jaho ŭdziełam.
foty Darji Burakinaj, Tut.by
«Za dźvie chviliny da finalnaj sireny trenier «Miadźviedziaŭ» Dzianis Mahiłataŭ źniaŭ z hulni bramnika i vypuściŭ šostaha palavoha chakieista. Cisk na varoty «Hryfonaŭ» uzrastaŭ, što vyliłasia ŭ bojku. U centry padziej apynulisia Paźniakoŭ, Hałavač, Lichtarovič ad «Miadźviedziaŭ» i dva habarytnyja hulcy z boku «Hryfonaŭ», što možna bačyć na fota. Sudździa-infarmatar abviaściŭ, što za hrubaść małym dyscyplinarnym štrafam pakaranyja Ivan Lichtarovič i Mikałaj Łukašenka. Paźniej «hołas» udakładniŭ, što pakarańnie panios nie Łukašenka, a Tabolin, — adznačaje karespandent Tut.by.
Pa viersii «Miadźviedziaŭ», mienavita ich hulec Alaksandr Tabolin staŭ zavadataram kanfliktu. Jon šturchnuŭ Lichtaroviča ŭ śpinu, toj adkazaŭ. Zatym u epicentry padziej apynuŭsia Kola Łukašenka.
«Bojka z Łukašenkam amal zdaryłasia, ale Sania niešta zbajaŭsia», — «napchaŭ» partnioru Ivan Lichtarovič.
— Vania hladzieŭ na mianie, a ja na jaho, — uzhadaŭ epizod «miadźviedź» Saša Hałavač. — Pramilhnuła iskra — boj, varjactva. U vyniku sudździ svoječasova raźniali».
— Šou nie atrymałasia? — pytańnie kapitanu «Miadźviedzia» Daniku Paźniakovu.
— Tak, jak chaciełasia, nie atrymałasia. Na žal. Treba było paviesialić hledačoŭ u kancoŭcy. Chaciełasia, kab choć niešta pra matč zapomniłasia. Heta ž byŭ apošni hod, kali mahli vyjhrać haradski adboračny turnir, zasmučanyja. Chacieli pieramahčy. Prajhrali z-za svaich pamyłak».
U matčy pieramahli «Hryfony». Kola Łukašenka zakinuŭ adnu z šajbaŭ.