Kalinin: Most nad Prypiaćciu moh pravisnuć praz kanstrukcyjnyja niedachopy. U Biełarusi jašče čatyry takija ž mosty
Pryčynaj razbureńnia mosta nad Prypiaćciu ŭ rajonie horada Žytkavičy Homielskaj vobłaści mahli stać jaho kanstrukcyjnyja niedachopy. Pra heta zajaviŭ vice-premjer Anatol Kalinin.
Kančatkovuju vysnovu ab pryčynach zdareńnia pavinna budzie zrabić śpiecyjalnaja kamisija Mintransa. Jana taksama pradstavić vysnovy ab mierach pa likvidacyi dadzienaj nadzvyčajnaj situacyi.
«Albo budzie zamieniena paškodžanaja častka mosta, albo jon budzie abnoŭleny całkam», — skazaŭ Anatol Kalinin.
Hetyja rekamiendacyi buduć važnyja i tym, što ŭ krainie isnuje piać mostaŭ anałahičnaj kanstrukcyi. Adzin ź ich u rajonie Babrujska ŭžo kapitalna ramantavaŭsia.
«Tamu nieabchodna budzie razhledzieć pytańnie ab uzmacnieńni kanstrukcyj inšych padobnych mostaŭ. Na adnaŭleńnie mosta pad Babrujskam syšło kala hoda. Z ulikam isnujučaha dośviedu most pad Žytkavičami budzie adnoŭleny ŭ bolš karotkija terminy», — adznačyŭ vice-premjer.
Pantonny most praz raku Prypiać u rajonie Žytkavičaŭ pačnie pracavać 10 śniežnia.
Nahadajem, na moście praz Prypiać, raźmieščanym na 17-m km aŭtadarohi R88 Žytkavičy — Davyd-Haradok — miaža Ukrainy, 7 śniežnia była vyjaŭlenaja viertykalnaja prasadka jezdavoha pałatna. Zabaronieny ruch pa moście ŭsich vidaŭ transpartnych srodkaŭ.
