Jak na Pinščynie piakuć chleb pavodle staradaŭnich receptaŭ. I jak na śviežy chleb reahuje kot VIDEA
Chleb nad panami pan i ŭsiamu hałava. A bieź jaho zaŭsiody niečaha nie chapaje navat padčas samaha šykoŭnaha častavańnia. U narodzie ž prymaŭlajuć taksama: Nie my chleb nosim, ale chleb nas.
Akazvajecca, niekatoryja ludzi ŭ Biełarusi dahetul piakuć duchmianyja bochany ŭdoma pavodle daŭnich receptaŭ. Prahrama «Viaskoŭcy» telekanała «Biełsat» vypraviłasia ŭ biełaruskija sieliščy, kab raskryć tajamnicy vypiakańnia chatniaha chleba tradycyjnym sposabam — u piečy. Viadoŭca Viktar Šukiełovič daviedaŭsia, čamu nikoli nie myjuć dziažu dla chlebnaj roščyny dy vypiakajuć bochany na dubovych listach, a taksama pry nahodzie papraktykavaŭsia ŭ paleskaj havorcy.
Adna ź biełaruskich haspadyń pakazała dy padrabiazna raspaviała pra ŭsie etapy vypiakańnia chleba, praŭda, videa, na žal, nie zmahło pieradać usich adcieńniaŭ vodaru śviežaha chleba. Ale adzin z hierojaŭ vydańnia — chatni kot, jaki, hrejučysia kala piečy, vypadkova absmaliŭ sabie bok, kałarytna prademanstravaŭ svaje adčuvańni, ledź nie ašaleŭšy ad chlebnaha pachu.
Akramia hetaha, Viktar paznajomiŭsia z cudoŭnaj viaskovaj paraj, jakaja pražyła razam užo bolš za 60 hadoŭ. I praz stolki času jany zachavali adno da adnaho vielmi ciopłyja pačućci. Doŭhimi zimovymi viečarami jany ŭzhadvajuć byłyja časiny dy radujucca kožnamu hościu. Viktara ž jany pavučyli pleści dyvanki, raspaviali pra vyrableńnie lonu, a taksama pakazali svaje skarby — cełyja suvoi damatkanaha pałatna, jakoje zachoŭvajecca jak pamiać.
