Mastak i pierformier Michaił Hulin: «Šnuravu ŭ Minsku dazvolili kuryć i maciukacca na pres-kanfierencyi. Heta narmalna?»
Cvaimi ŭražańniami ad adkryćcia vystavy ŭ Minsku Siarhieja Šnurava padzialiŭsia ŭ svaim fejsbuku minski mastak i pierformier Michaił Hulin.
Nahadajem, što vystava rasijskaha muzyki, lidara «Leninhrada» «Retraśpiektyva brendrealizmu» prachodzić z 1 śniežnia ŭ Nacyjanalnym centry sučasnych mastactvaŭ (NCSM), što na vulicy Niakrasava.
«Jakaja ž Minsk usio ž taki łachoŭskaja vioska… Heta ja na masavy ekstaz i inšyja cudy, pieražytyja na adkryćci vystavy Šnura — našym bamondam i demanstracyjaj dałučanaści. Zorcy dazvolili ŭsio: niazmušana žartavać, maciukacca i kuryć. Vam paŭsiul!
Ščyra skažu, ciažka hladzieć na heta biełaruskamu mastaku, jakomu miascovaja cenzura šmat hadoŭ nie dazvalaje paŭnavartasna vystaŭlacca na minskich placoŭkach», — ździŭlajecca Hulin
«U 16-m hodzie na vystavie «Usio było pa-inšamu» — kampanija-sponsar u tym ža NCSM zaviarnuła prajekt z-za videa, na jakim byli pakazanyja žanočyja hrudzi. U hetaj ža ŭstanovie mianie prasili zahadzia zaćviardžać usie svaje prajekty. Ja adziny z udzielnikaŭ asabista apisvaŭ svaje pracy dla dyrektara i jaje namieśnicy. Pakadrava raspaviadaŭ siužet videa! Nie ŭ ahulnych słovach, nie kancepcyju!
Usio ŭ tym ža 16-m hodzie ja nie prajšoŭ z 2-ma prapanovami dla ŭdziełu ŭ prajekcie «Art-vyspy», jakuju kuryruje NCSM. Adnym ź ich była skulptura-transformier, jakaja składajecca z frahmientaŭ čałaviečych cieł. Usie hetyja frahmienty — častki viadomych skulptur. Sens byŭ u tym, kab prasačyć, jak mianialisia estetyčnyja ŭjaŭleńni ad niealitu da našych dzion, i kab hladač moh vybirać i kanstrujavać svaju identyčnaść, svaju formu. Dyrektar NCSM paprasiła źmianić eskiz i prybrać usie miescy, dzie bačnyja pałavyja prykmiety. Maje tłumačeńni, što heta i jość častka idei i ŭsie hetyja tvory viadomyja i demanstrujucca publična, nijakaha efiektu nie mieli.
U 17-m ja padavaŭsia na Nacyjanalnuju premiju ŭ halinie mastactva ź pierformansam «Baraćba za mastactva». Videa hetaha pierformansu znachodzicca ŭ kalekcyi Paŭnočna-Kaŭkazskaha filijała NCSM, ź im ja ŭdzielničaŭ u 6-aj Maskoŭskaj bijenale. U Biełarusi nie ŭvajšoŭ navat u šort-list, paličyli hetuju pracu pramym palityčnym vykazvańniem — ab dysbałansie sportu i mastactva ŭ krainie.
U mai hetaha hoda — siabry, darečy viadomyja muzyki, zaprasili paŭdzielničać u feście. Pa ich zadumcy, heta pavinna była być kałabaracyja mastactvaŭ: muzyka, pierformans, taniec, videa. Padali zajaŭku ŭ Nacyjanalny mastacki muziej. Praź niekatory čas namieśnik dyrektara vyklikała dla razmovy na padstavie majho proźvišča ŭ śpisie ŭdzielnikaŭ. Na hetaj sustrečy mianie paprasili dasłać scenar svajho pierformansu, ale ŭžo na nastupny dzień kamandzie fiestyvalu było admoŭlena ŭ padtrymcy i pamiaškańni.
I da samoha Šnurava pytańniaŭ nijakich. Mastactva prostaje, zrazumiełaje, viasiołaje, anałahavaje — «Mister Mazhapraŭ» ź filma «Vychad praz suvienirnuju kramu». I sam — aroł-pryhažun, charyzmatyčny čałaviek, jak ja paśpieŭ zrazumieć z fejsbučnaj stužki. Ale sumna ŭsio heta…
Jak skazała Antanina Słabodčykava, hledziačy na fotazdymak Uładzimira Ceślera, jaki kuryć razam sa Šnuravym: «Sumna ž nie ad taho, što Ceśler kuryć, sumna ad taho, što jon kuryć, bo Šnuru dazvolili».
