WADA znajšło novyja paćvierdžańni abvinavačvańniaŭ Rodčankava
Suśvietnaje antydopinhavaje ahienctva (WADA) zajaviła pra sapraŭdnaść atrymanaha im elektronnaha fajła, u jakim utrymlivałasia baza dadzienych dopinh-probaŭ rasijskich spartsmienaŭ sa studzienia 2012 pa žnivień 2015 hoda.
Pra heta ŭ niadzielu, 3 śniežnia, paviedamiła redakcyja ARD/WDR, jakaja zajmajecca pytańniami vykarystańnia dopinhu ŭ sporcie, sa spasyłkaj na hałoŭnaha śledčaha WADA Hiuntera Junhiera, piša Deutsche Welle.
«My zaviaršyli kryminalistyčnuju ekśpiertyzu i možam paćvierdzić sapraŭdnaść hetaj bazy dadzienych», — padkreśliŭ Junhier. Jon dadaŭ, što jaje ŭtrymańnie padmacoŭvaje śćviardžeńni eks-kiraŭnika «antydopinhavaha centra» Ryhora Rodčankava pra toje, što ŭ nazvany pieryjad u Rasii na dziaržaŭnym uzroŭni rabilisia namahańni «dla abarony rasiejskich atletaŭ, jakija, jak miarkujecca, udzielničali ŭ prahramie dopinhu». Pa słovach Junhiera, «rasśledavańnie budzie praciahnuta», kab vyśvietlić imiony kankretnych spartsmienaŭ.
Zajava WADA uzmacniła cisk na funkcyjanieraŭ Mižnarodnaha alimpijskaha kamiteta (MAK), jakija ŭviečary 5 śniežnia na pasiadžeńni ŭ Łazanie pavinny pryniać rašeńnie ab sankcyjach u dačynieńni da rasijskaj zbornaj. Siarod mahčymych mier — poŭnaja zabarona na jaje ŭdzieł u Hulniach u Pchienčchanie abo ŭdzieł u Alimpijadzie pad niejtralnym ściaham i bujny hrašovy štraf.
Jak paviedamiła ŭ listapadzie The New York Times, fajł z vynikami dopinh-testaŭ u Maskoŭskaj antydopinhavaj łabaratoryi byŭ pieradadzieny WADA ŭ kastryčniku niejkim infarmataram, a nie praz aficyjnyja kanały.
