Karparacyja Google całkam pierajšła na spažyvańnie tolki vietravoj i soniečnaj elektraenierhii
Google aficyjna abvieściła siabie kampanijaj, jakaja całkam pierajšła na 100% adnaŭlalnaj enierhii — soniečnaj i vietravoj. Pra heta zajaviŭ Sem Arans z departamienta enierhietyki i infrastruktury Google, paviedamlajecca na staroncy kampanii ŭ Twitter.
«Plus 535 MVt pavialičyli ahulny abjom spažyvanaj enierhii Google da 3 HVt — 2 ch 98 MVt u Paŭdniovaj Dakocie, 200 MVt u Ajovie i 138,6 MVt u Akłachomie. Heta robić Google najbujniejšym karparatyŭnym pakupnikom adnaŭlalnaj enierhii na płaniecie i pieravodzić jaje na 100% spažyvańnie tolki adnaŭlalnaj enierhii ŭžo ŭ 2017 hodzie», — piša jon.
Pieršy kantrakt z dastaŭcam vietravoj elektraenierhii kampanija zaklučyła jašče ŭ 2010 hodzie. Kab dasiahnuć pierachodu na 100% adnaŭlalnaj enierhii, Google zaklučaŭ i zaklučaje naŭprostavyja kantrakty z vytvorcami takoj enierhii, paralelna aptymizujučy svaje data-centry na bolš efiektyŭnyja madeli pracy.
Pavodle danych samoj kampanii, jaje data-centry na 50% bolš enierhaefiektyŭnyja, čym u siarednim pa rynku. Hety prajekt pa pierachodzie na bolš ekałahičnyja krynicy enierhii maje nie tolki sacyjalnaje značeńnie, śćviardžajuć u Google.
Jon ekanamična abhruntavany, pakolki za apošnija šeść hadoŭ košt soniečnaj i vietravoj enierhii źniziŭsia na 80% i 60% adpaviedna.
