Rasijskaja prapahanda zackavała sibirskaha školnika, jaki skazaŭ pra «niavinna zabitych» niemcaŭ
Mikałaj Dziesiatničenka — staršakłaśnik ź sibirskaha horada Novy Urenhoj. 19 listapada jon vystupiŭ z pramovaj u niamieckim bundestahu ŭ Dzień žałoby, jaki adznačajecca ŭ Hiermanii ŭ pamiać ab achviarach vojnaŭ i dziaržaŭnaha hvałtu.
Dziesiatničenka raskazaŭ historyju sałdata Hieorha Jochana Rau, jaki ŭdzielničaŭ u Stalinhradskaj bitvie. Tolki ŭ 2016 svajaki Rau daviedalisia, dzie pachavany Hieorh. Dziesiatničenku vielmi ŭraziła hetaja historyja, jon naviedaŭ miesca pachavańnia niamieckaha sałdata ŭ Kapiejsku Čalabinskaj vobłaści. I paškadavaŭ, što hetyja mohiłki znachodziacca ŭ žachlivym stanie.
«Ja pabačyŭ mahiły niavinna zahinułych ludziej, siarod jakich mnohija chacieli žyć mirna i nie vajavać», — skazaŭ chłopiec. Jahonaja dumka zvodziłasia da taho, što mnohija niemcy nie chacieli vajavać, a stali achviarami abstavin.
Paśla hetaha pačałosia sapraŭdnaje ckvańnie chłopca ŭ sacyjalnych sietkach i publičnaj prastory. Uralski błohier Siarhiej Kalaśnikaŭ napisaŭ zvarot u FSB, hienieralnuju prakuraturu i administracyju Pucina, dzie abvinavaciŭ Dziesiatničenku ŭ publičnym apraŭdańni nacyzmu. Namieśnik kiraŭnika Savieta Fiederacyi Uładzimir Džabaraŭ acaniŭ takoje vystupleńnie jak «niedapuščalnaje».
Ukantakcie školniku pišuć, što buduć jaho źbivać, syplacca i inšyja pahrozy, u tym liku i zabojstva. U svaju čarhu za Dziesiatničenku zastupiŭsia mer Novaha Urenhoja Ivan Kastahryz. «Spadziajusia, razumny sens pieramoža», — skazaŭ jon.
«Niavinnyja achviary» supraciŭlalisia da apošniaha. Vajavali za Hitlera», — u efiry Pieršaha kanała skazaŭ dyrektar rasijskaha vajskova-histaryčnaha tavarystva Michaił Miahkoŭ.
Niekatoryja miarkujuć, što sam školnik nie moh napisać hetki tekst, a za jaho heta zrabiŭ niechta z nastaŭnikaŭ. Patrabujuć praviadzieńnia detalovaha rasśledavańnia i pakarańnia vinavatych. Pravodzicca pravierka himnazii, dzie vučycca chłopiec.
Prapahandyst Uładzimir Sałaŭjoŭ prapanavaŭ Dziesiatničenku lepš zvazić na miesca pachavańnia savieckich sałdat u Sankt-Pieciarburh ci Vałhahrad.
U situacyju daviałosia ŭmiešvacca pres-sakrataru Pucina Dźmitryju Piaskovu, jaki nazvaŭ situacyju «ekzaltavanym ckavańniem». Piaskoŭ skazaŭ, što školnik nie mieŭ na ŭvazie ničoha kiepskaha i vielmi chvalavaŭsia.
