Francuza z patronam pryznali nievinavatym i apraŭdali
Fota Ivana Jaryvanoviča
Siońnia ŭ Homieli sud vynies prysud hramadzianinu Francyi Žałanu Vijo, jaki sprabavaŭ pravieźci praź biełaruska-ŭkrainskuju miažu patron. Jaho pryznali nievinavatym i apraŭdali — za adsutnaściu ŭ jaho dziejańniach składu złačynstva, piša Tut.by
U tym, što Žałan Vijo siońnia vyjdzie na volu, u zale suda nichto ŭžo nie sumniavaŭsia. Na papiarednim pasiadžeńni navat dziaržabvinavaŭca prapanavała, spasyłajučysia na admysłovy artykuł Kryminalnaha kodeksa, pryznačyć jamu pakarańnie nižej za praduhledžany minimum — a mienavita abmiežavacca, choć i niemałym (6900 rubloŭ), štrafam i adpuścić francuzskaha chłopca. Tym nie mienš sudździa ŭziała paŭzu. I vychodnyja abvinavačanamu pryjšłosia pravieści ŭ SIZA.
Siońnia sudovaje pasiadžeńnie pačałosia z apošniaha słova abvinavačanaha.
— Usio svajo žyćcio ja staraŭsia być sumlennym, z pavahaj staviŭsia da zakonaŭ svajoj krainy Francyi i Vialikabrytanii, dzie ja žyvu, i luboj inšaj krainy, dzie kročyła maja naha. U mianie nie było namieru pryjechać siudy i ŭčynić złačynstva, — zajaviŭ Žałan.
Małady čałaviek adznačyŭ, što pryjechaŭ u krainu, kab naviedać svaju znajomuju. Ale, niahledziačy na pieršy admoŭny dośvied, zajaviŭ Vijo, jon nie rasčaravany ŭ Biełarusi, a kranuty tym, nakolki ŭvažlivyja byli nieznajomyja ludzi, jakija dasyłali pasyłki i listy sa słovami padtrymki.
- Ja lublu padarožničać, bo lublu svabodu. I nikoli b nie pramianiaŭ svabodu na hety suvienir. Jašče raz paŭtaru, što ja nie mieŭ namieru ŭčyniać złačynstva. Hety termin užo, dumaju, dastatkovy, tamu što ja pieražyŭ stolki bojazi, stolki ŭsiaho, što heta było dla mianie dobrym urokam …
Nahadajem, što krychu bolš za try miesiacy tamu 24-hadovy francuz adpraviŭsia ŭ padarožža pa Jeŭropie: Ispanii, Italii, Słavienii, Charvatyi, Vienhryi, Aŭstryi, Słavakii. A 21 vieraśnia Vijo zatrymali pry vyjeździe ź Biełarusi va Ukrainu pry prachodžańni mytnaha kantrolu pa «čyrvonym kalidory»: siarod jaho rečaŭ byŭ znojdzieny patron, jaki, jak śćviardžaje inšaziemiec, jamu na pamiać padaryŭ jaho siabar-palak.
Ekśpiertyza pakazała, što patron rabočy i moža vykarystoŭvacca ŭ jakaści bojeprypasu. Tak Vijo apynuŭsia za kratami. Jon abvinavačvaŭsia adrazu pa dvuch artykułach, źviazanych ź niezakonnymi dziejańniami ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ i niezakonnym pieramiaščeńniem ich praź miažu.
