«U Ženi i doma, i ŭ škole, usio było ŭ paradku»: padrabiaznaści trahiedyi ŭ Maładziečnie
Źnikły padletak znojdzieny paviešanym na drevie na ŭskrainie Maładziečna prykładna za kiłamietr ad doma, piša mlyn.by
15-hadovy školnik źnik 16 listapada. Pajšoŭ z doma, pakinuŭšy na stale mabilny telefon. Jaho šukali baćki, svajaki, supracoŭniki Maładziečanskaha RAUS i pradstaŭniki pošukava-vyratavalnaha atrada «Anioł». U subotu kala 17.00 jon byŭ znojdzieny paviešanym, paviedamili pradstaŭniki Maładziečanskaha RAUS.
Siamja zahinułaha školnika charaktaryzujecca jak dobraja. Kanfliktaŭ u škole ŭ padletka nie było.
Nastaŭniki da apošniaha spadziavalisia, što ich vučań vierniecca dadomu žyvym.
«Ženia ros u vielmi dobraj i pravilnaj siamji, - raspaviadaje dyrektar škoły №1 Piotr Chrol.
— Baćki lubiać dziaciej, padtrymlivajuć, starajucca dać dobruju adukacyju. U našaj škole vučylisia i dźvie starejšyja siastry chłopčyka. Jany abiedźvie pastupili ŭ VNU, atrymali adukacyju, žyvuć u Minsku. Ženia byŭ dobrym, vychavanym, starannym vučniem, da jakoha piedahohi nikoli nie mieli nijakich pretenzij. Ale zaŭsiody vučyŭsia roŭna, byŭ u załatoj siaredzinie».
«Viersii my ahučvali roznyja, - kaža sp. Chrol. - Choć raniej za chłopcam nikoli takoha nie było. Jon siabravaŭ z mamaj, zaŭsiody joj pra ŭsio raskazvaŭ, kali kudyści išoŭ, abaviazkova staviŭ u viadomaść. Kab zrazumieć, jak ža tak atrymałasia, treba budzie jašče šmat čaho asensavać. A pakul hetaja strašnaja trahiedyja prosta nie ŭkładajecca ŭ hałavie».
