Astranomy adpravili radyjosihnał da susiedniaj zornaj sistemy. Navošta?
Niekamiercyjnaja arhanizacyja METI adpraviła da zorki Lejtena radyjopasłańnie, dziakujučy jakomu praz 25 hod z nami zmohuć źviazacca inšyja cyvilizacyi, kali jany ŭ toj častcy Suśvietu isnujuć.
Novy prajekt nakiravany na sistemu GJ 273, viadomuju taksama jak zorka Lejtena, jakaja znachodzicca na adlehłaści ŭsiaho 12,36 śvietłavoha hoda ad Ziamli. Misija atrymała nazvu Sónar Calling GJ 273b i ažyćciaŭlajecca ŭ partniorstvie ź Instytutam kaśmičnych daśledavańniaŭ Katałonii i fiestyvalem Sónar.
GJ 273b — adna ź dźviuch viadomych płaniet na arbicie zorki Lejtena, na jakoj, mahčyma, jość umovy, nieabchodnyja dla ŭźniknieńnia žyćcia.
Akramia nadziej adnojčy atrymać ad žycharoŭ dalokaj płaniety adkaz, prajekt taksama stavić za metu raźvićcio patencyjna novaha padychodu da pošuku pazaziemnaha žyćcia ŭ kosmasie.
«Heta vyprabavańnie mietodyki, jakaja ŭ budučyni paŭtorycca sotniu, tysiaču, a kali spatrebicca — navat miljon razoŭ!», — zajaviŭ prezident METI Duhłas Vakoch u intervju Space.com.
Adpraŭlenaje paviedamleńnie ŭtrymlivaje padrabiaźniejšuju instrukcyju pa zvarotnaj suviazi, a taksama 33 karotkija muzyčnyja tvory, adabranyja kreatyŭnym adździełam Sónar.
Radyjosihnał byŭ zapuščany z dapamohaj EISCAT, 32-mietrovaj anteny ŭ narviežskim Tromsio. Uličvajučy, što GJ 273 znachodzicca davoli blizka da našaj płaniety (pa mierkach kosmasu), u vypadku pośpiechu my atrymajem adkaz za bližejšyja niekalki dziesiacihodździaŭ: termin prachodžańnia sihnału ŭ adzin bok składaje krychu bolš za 12 hadoŭ.
