Historyk, jaki pieranazyvaje vulicy ŭ Polščy: Pytańnie z Taraškievičam užo kančatkova zakryta, nad Kołasam jašče pracujem
Pra heta u intervju Radyjo Svaboda zajaviŭ doktar histaryčnych navuk, kiraŭnik hrupy, jakaja aceńvaje bijahrafii patronaŭ polskich vulic i płoščaŭ, Maciej Korkuć. Tak, u Bielsku-Padlaskim pierajmienujuć nie tolki vulicu Branisłava Taraškieviča, ale i biełaruski licej, nazvany ŭ jaho honar. Pryčyny — u kamunistyčnym minułym biełaruskaha dziejača.
— U Hajnaŭcy jość vulicy Kołasa i Kupały. Jaki los ich čakaje?
— Da vulicy Janki Kupały ŭ nas niama pytańniaŭ. Jon nie byŭ aktyŭnym dziejačom partyi, jak Taraškievič. Navat u savieckaj litaratury jon šukaŭ dla siabie miesca. Navat kali nie ŭsio ŭ jaho bijahrafii było idealnaje, to jon źjaŭlajecca biassprečnym simvałam biełaruskaj kultury. I my heta šanujem. U Kupały jość vulica ŭ Hdańsku. My nie źviartalisia nakont zamieny jaho vulicy. Biełarusy — heta blizki nam narod i ŭ ich šmat hierojaŭ. Jany taksama byli achviarami tatalitaryzmaŭ. Nad Kołasam my jašče pracujem.
— Pytańnie z Taraškievičam vyrašanaje i my čakajem tolki podpis vajavody?
— Ja adkažu vam pytańniem. Ci mahčyma źmianić bijahrafiju Branisłava Taraškieviča, kab nie padmanvać hramadskuju dumku? Dumaju, što nie. My nia chočam i nie možam manipulavać. My biarem pad uvahu detali, tamu i stavim u adno miesca Taraškieviča, a ŭ inšaje miesca — Kupału. Zrazumiejcie, što dla nas u pracesie dekamunizacyi nacyjanalnaść nie maje značeńnia. Što z taho, što Feliks Dziaržynski byŭ maim ziemlakom, kali heta kryvavy złačynca i sustvaralnik antyčałaviečaj systemy. U nas nie pavinna być miesca dla takich ludziej, i nie važna, što jon byŭ palakam.
