400 zvyšbahaciejaŭ ZŠA paprasili nie źnižać sabie padatkaŭ
Bolš za 400 miljanieraŭ i miljarderaŭ, siarod jakich Džordž Soras i Styvien Rakfieler, nakiravali ŭ kanhres ZŠA list z prośbaj nie źnižać padatki dla zvyšbahatych hramadzian, paviedamlaje The Washington Post.
Džordž Soras
Pad dakumientam padpisalisia finansist Džordž Soras, viadomy miecenat i fiłantrop Styvien Rakfieler i mnohija inšyja mienš viadomyja amierykancy, jakija ŭvachodziać u najbolej bahatyja 5% nasielnictva (tyja, u kaho jość aktyvy jak minimum na 1,5 młn dalaraŭ abo štohadovy zarobak u čverć miljona). Arhanizataram zboru podpisaŭ staŭ ruch Responsible Wealth ( «Adkaznaje bahaćcie»).
Aŭtary lista śćviardžajuć, što źnižeńnie padatkaŭ dla zvyšbahatych było b pamyłkaj u situacyi, kali nacyjanalny doŭh ZŠA i ŭzrovień niaroŭnaści ŭ krainie znachodziacca na rekordnych adznakach. Padpisanty prosiać členaŭ kanhresa pavysić padatkovuju nahruzku dla zvyšbahatych.
«Źnižeńnie padatkaŭ — heta absurd. Respublikancy kažuć, što kraina nie moža dazvolić sabie marnavać hrošy, ale ŭ toj ža čas moža dazvolić vielizarnyja padatkovyja pasłableńni dla bahatych. Heta biazhłuździca », — ličyć Bob Krendał, eks-kiraŭnik adnoj z najbujniejšych amierykanskich avijakampanij American Airlines.
Padatki na zvyšbahaćcie abiacaŭ źnizić padčas svajoj pieradvybarčaj kampanii Donald Tramp. Niadaŭna abiedźvie pałaty kanhresa ZŠA apublikavali padatkovyja płany. U abodvuch varyjantach padatkovaja nahruzka dla zamožnych amierykancaŭ źnižanaja. U prajekcie Sienata padatkovaja staŭka dla chatnich haspadarak z zarobkami bolš 1 młn dalaraŭ i hramadzian z zarobkami bolš za paŭmiljona źnižanaja z 39,6 da 38,5%.
Na minułym tydni vašynhtonski Institute for Policy Studies padličyŭ, što troje najbahaciejšych amierykancaŭ (zasnavalnik Microsoft Bił Hiejts, zasnavalnik Amazon Džef Biezas i kiraŭnik inviestkampanii Berkshire Hathaway Uoren Bafet) bahaciejšyja za pałovu nasielnictva ZŠA razam uziatuju (kala 160 młn čałaviek) - ichniaje sumarnaje bahaćcie składaje kala 250 miljardaŭ dalaraŭ.
