Hajd pa hiendarnych arhanizacyjach, jaki lepš zachavać: kudy biehčy, kali raptam što jakoje
Z čaho pačać, kali ty maryš pra ŭłasny biznes, kali nie viedaješ, jak dapamahčy siabroŭcy, jakuju bje muž ci jakuju niespraviadliva zvolnili z pracy, jak dałučycca da žanočaj kamandy pa amierykanskim futbole…
Kab daremna nie huhlić pa sto razoŭ, publikujem śpis asnoŭnych biełaruskich arhanizacyj, jakija zajmajucca hiendarnymi pytańniami i adstojvajuć pravy jak žančyn, tak i mužčyn. Paznajomicca ź imi asabista ŭsie achvotnyja mahli na «Ščyrych razmovach», jakija «Žyvaja biblijateka» zładziła razam ź Jeŭrapiejskim kaledžam Liberal Arts u Biełarusi ŭ miežach hiendarnaha modula.
Hramadskaje abjadnańnie «Radzisłava»
Minskaja arhanizacyja z ułasnym prytułkam, dzie možna pieračakać składanyja dni žančynam i dzieciam, jakija stali achviarami siamiejnaha hvałtu. Užo 15 hadoŭ śpiecyjalistki «Radzisłavy» nie tolki dapamahajuć z kansultacyjami psichołahaŭ i jurystaŭ, ale i adukoŭvajuć supracoŭnikaŭ milicyi, sacyjalnych orhanaŭ — vučać ich pravilna reahavać na vypadki hvałtu ŭ siemjach. Akramia taho, siłami centra ładziacca vielmi karysnyja treninhi pa samaabaronie dla žančyn i zdolnaści nie paddavacca ŭpłyvu i suzaležnaści Wen-Do.
Darečy, u śniežni płanujecca čarhovy taki adkryty treninh — sačy za abjavami.
Mižnarodnaje hramadskaje abjadnańnie «Hiendarnyja pierśpiektyvy»
Taksama pracuje z achviarami hvałtu. Ad 2013 hoda jaje śpiecyjalistki štodzień dziažurać na telefonie ahulnanacyjanalnaj haračaj linii 8-801-100-8-801 i hatovyja dać parady kožnamu, chto paprosić dapamohi.
Štatnyja supracoŭniki biaspłatna kansultujuć pa pytańniach biaśpiečnaha vyjezdu i znachodžańnia za miažoj (infalinija 113) i prasoŭvajuć pryncypy hiendarnaj roŭnaści. Kali damahajucca na pracy, kali zvolnili, daviedaŭšysia, što čakaješ dzicia, — tabie siudy.
«Centr pa prasoŭvańni pravoŭ žančyn — Jaje pravy»
Niekatoryja daviedalisia pra isnavańnie centra paśla taho, jak śpiecyjalisty pačali aktyŭnuju baraćbu suprać seksisckaj rekłamy kampanii «Mark Farmel». Zmahacca z takimi źjavami ŭ rekłamie ci ŚMI — adna z zadač arhanizacyi. Akramia taho, arhanizacyja dapamahaje vyrašać majomasnyja kanflikty, prablemy z dostupam da pracy, adukacyi, achovy zdaroŭja.
Asablivuju ŭvahu «Jaje pravy» nadaje samym uraźlivym hrupam — dziaŭčynkam ź niapoŭnych siemjaŭ, z rehijonaŭ i inšym.
IVKA, Biełaruskaja asacyjacyja maładych chryścijanskich žančyn
Arhanizacyja, jakaja pieršyja kroki rabiła jašče ŭ 1996 hodzie, siońnia maje łakalnyja filijały ŭ šaści biełaruskich haradach: Babrujsku, Homieli, Mazyry, Navapołacku, Smarhoni.
IVKA pracuje pa ŭłasnaj lidarskaj prahramie dla maładych dziaŭčat, a svajoj hałoŭnaj kaštoŭnaściu nazyvaje hiendarnuju roŭnaść.
Akramia dapamohi achviaram hvałtu, arhanizacyja zajmajecca miascovaj intehracyjaj biežancaŭ, naprykład, z Ukrainy, i raspracoŭvaje subprajekty ŭ takich temach, jak rak małočnaj załozy i VIČ.
Supolnaść ProWomen.by
«Maryš pra ŭłasny biznes? Dziejničaj!» Hety łozunh možna nazvać asnoŭnym u hetaj arhanizacyi, jakaja zrobić usio mahčymaje, kab tabie ŭ hetym dapamahčy. Jak? Pryciahnie patrebnych ekśpiertaŭ, pakaža historyi realnych pośpiechaŭ i dapamoža z karysnymi suviaziami.
ProWomen.by užo zładzili niekalki sieryj biaspłatnych lekcyj dla žančyn-pradprymalnic i tych, chto choča imi stać. Prasoŭvańnie brenda ŭ instahramie, kraŭdfandynh dla biznesu — tolki niekatoryja z tych tem, što razhladalisia na lekcyjach. Sačy za navinami, kab nie prapuścić nastupnuju sustreču.
Sacyjalna-spartyŭny prajekt «Zdolnaja»
Udzielnicy «Zdolnaj» lubuju zaradziać spartyŭnym azartam. Na ich treniroŭkach možna navučycca hulać u kłasičny ci amierykanski futboł, pasprabavać niejkuju ekstremalnuju aktyŭnaść, navat kali ty nikoli raniej nie siabravała sa sportam.
«Zdolnaja» vystupaje za toje, kab kožnaja biełaruska mieła čas i mahčymaść zajmacca lubym vidam sportu, biez abmiežavańniaŭ i biez bojazi, što niechta budzie aceńvać jaje źniešnaść.
Supolnaść «Fajna»
Jašče adzin prajekt, jaki raźbivaje roznyja stereatypy praź fizičnuju aktyŭnaść. Aktyvistki «Fajna» ładziać ekałahičnyja pachody dla biełarusak, praź jakija danosiać dumku: žančyny taksama zdolnyja vyžyć u dzikim lesie, samastojna raźvieści vohnišča, raźbić pałatku i skaapieravacca z susiedkami ŭ ekstremalnaj situacyi.
Novyja pachody pa niekranutych miaścinach Biełarusi płanujucca pryblizna ŭ mai, jak tolki krychu paciapleje.
Asacyjacyja biełaruskich hajdaŭ
A voś klovaja aktyŭnaść dla dziaciej: dałučycca da ruchu asacyjacyi možna ŭžo ź siami hadoŭ. Ad 2002 hoda ABH źjaŭlajecca siabram Suśvietnaj asacyjacyi dziaŭčynak-hajdaŭ i dziaŭčynak-skaŭtaŭ (VAHHHS), jakaja abjadnoŭvaje bolš za 10 miljonaŭ dziaŭčynak i žančyn z 145 krain śvietu.
Asnoŭny ruch asacyjacyi adbyvajecca letam: u łahierach, z pałatkami i palavoj kuchniaj. Kožny łahier pryśviečany niejkaj temie. Minuły jakraz zajmaŭsia hiendarnymi pytańniami. Praz hulni-treninhi chłopčykam i dziaŭčynkam raskazvali, što niama čysta žanočych i mužčynskich abaviazkaŭ. U cełym ža asacyjacyja — heta kłasnaja mahčymaść znajści siabroŭ i adnadumcaŭ-lidaraŭ nie tolki ŭ Biełarusi, ale i za miažoj.
Makeout
Z 2014 hoda Makeout źbiraje i archivuje historyju ŁHBT i kvir-žyćcia ŭ Biełarusi. Robić toje, što rabili i inšyja nieabyjakavaja papiaredniki, ale potym niečakana źnikali. Kab nie źniknuć, jak byłyja kalehi, kamanda Makeout nie tolki viadzie tematyčny sajt, ładzić vystavy, ale zusim niadaŭna sabrała praz kraŭdfandynh-płatformu hrošy na drukavany almanach pra žyćcio supolnaści ŭ apošnija 20 hadoŭ.
Na žal, jurydyčnuju dapamohu tut u vypadku parušeńnia pravoŭ atrymać nielha, adnak padtrymku, salidarnaść adnadumcaŭ — na ŭsie 100 adsotkaŭ.
Niekamiercyjnaja kulturna-aśvietnickaja ŭstanova «DOTYK. Adukacyja i mastactva»
Dziejnaść «DOTYK» pačałasia z kinafiestyvalu, siońnia ž jana zajmajecca i arhanizacyjaj festaŭ, i asobnymi vystavami, i hulniatekami, i chutkimi sustrečami. Z kanca 2016 hoda pačaŭ pracavać kamjunici-centr — struktura, pryznačanaja akazvać psichałahičnuju i jurydyčnuju dapamohu achviaram dyskryminacyi na padstavie hiendarnaj identyčnaści i seksualnaj aryjentacyi, a taksama ich blizkim.
Pryjemny bonus: kali ty dobra raśpišaš kancepcyju svajoj tvorčaj idei, to kaściak i vałanciory «DOTYK» dapamohuć realizavać jaje na placoŭcy prastory «Stałoŭka XYZ».
