Jašče adna biełaruskaja tenisistka čakaje dzicia
Nie tolki Viktoryja Azaranka prapuskaje finał Kubka Fiederacyi pa siamiejnych abstavinach. Pa padobnych pryčynach u kamandu nie zajaŭlenaja i Volha Havarcova.
Jak stała viadoma «Salidarnaści», Volha Havarcova ciapier čakaje papaŭnieńnia. Chłopiec dziaŭčyny — chakieist.
Na cikavaje stanovišča tenisistki padčas pres-kanfierencyi napiaredadni finału namiaknuŭ i trenier žanočaj biełaruskaj zbornaj Eduard Dubroŭ.
«Vola ciapier u Minsku. Na matčy jana pavinna pryjści, va ŭsiakim razie abiacała. U jaje chutka płanujucca źmieny ŭ žyćci — stanoŭčyja. My vielmi rady za jaje. Jana zrabiła vialiki ŭniosak u naš pośpiech — hulała ŭ Kanadzie, Rasii i ŭ nas doma. Dobraha zdaroŭja joj i pośpiechaŭ u žyćci».
Volzie Havarcovaj 29 hadoŭ. Jana pieramahała na vaśmi turnirach WTA u pary, była 35-j rakietkaj śvietu ŭ adzinočcy, a na Šlemach dachodziła da čverćfinału Uimbłdona ŭ 2015-m hodzie.
Havarcova — adna z samych daśviedčanych tenisistak Biełarusi. Za zbornuju jana hulaje z 2008 hoda. Za hety čas jana praviała na korcie 39 matčaŭ.
