Supracoŭnik univiersiteta kultury Kryštapovič: «Ruskaja mova — rodnaja dla biełarusaŭ»
Były dziaržaŭny čynoŭnik, a siońnia načalnik Navukova-daśledčaha adździeła Biełaruskaha dziaržaŭnaha ŭniviersiteta kultury i mastactvaŭ Leŭ Kryštapovič na sajcie eurasia.expert vykazaŭsia nakont moŭnaj palityki ŭ Biełarusi.
«Ja liču, što čałaviek pavinien mieć mahčymaść havaryć na toj movie, na jakoj jon choča, najbolš zvykłaj dla jaho, i jakuju jon ličyć rodnaj.
Situacyja ŭ Biełarusi absalutna jasnaja: ruskaja (i heta fiksujuć sacyjałahičnyja daśledavańni) źjaŭlajecca nie prosta niejkaj druhoj movaj u adnosinach da biełaruskaj — heta rodnaja mova. Tamu niama nijakaj pryncypovaj roźnicy, na jakoj movie my budziem razmaŭlać — na biełaruskaj ci ruskaj», — skazaŭ Kryštapovič.
Ad 2008 da 2014 hoda Leŭ Kryštapovič źjaŭlaŭsia namieśnikam u Infarmacyjna-analityčnym centry pry Administracyi prezidenta. Tolki z prychodam novaha dyrektara Alaksieja Dzierbina Kryštapovič straciŭ svaju pasadu.
Doktaru fiłasofskich navuk Lvu Kryštapoviču 68 hadoŭ. Jon naradziŭsia ŭ vioscy Piekalin Smalavickaha rajona. Skončyŭ histfak BDU. Aŭtar knih: «Biełaruś jak ruskaja śviatynia», «Biełaruś i Rasija: histaryjasofskaje i cyvilizacyjnaje adzinstva».
Kryštapovič prytrymlivajecca zachodnierusisckich pohladaŭ, jakija ŭvažajuć ruskich, biełarusaŭ i ŭkraincaŭ adnym narodam. Źjaŭlajecca ŭdzielnikam prajekta «Zachodniaja Ruś», stały aŭtar sajta zapadrus.su.
Za čas pracy ŭ IAC Kryštapovič zapomniŭsia krytykaj prahramy Ministerstva kultury «Zamki Biełarusi», jakaja mieła na mecie adnaŭleńnie stračanaj architekturnaj spadčyny. Kryštapovič ža zaznačyŭ, što «mahnaty Radziviły, Sapiehi, Ahinskija nie majuć ničoha supolnaha ź biełaruskaj mientalnaściu», a historyju VKŁ varta vykinuć «na zvałku historyi».
Niekalki hadoŭ tamu Leŭ Kryštapovič atrymaŭ orden Družby ad Uładzimira Pucina za vialiki ŭkład va ŭmacavańnie družby i supracoŭnictva z Rasijaj.