U Vilni adkryvajuć miemaryjalnuju šyldu Jakuba Kołasa na byłoj redakcyi «NN»
9 listapada ŭ Vilni na budynku, u jakim 110 hod tamu mieściłasia redakcyja haziety «Naša Niva», adbudziecca ŭračystaja cyrymonija adkryćcia miemaryjalnaj šyldy ŭ honar narodnaha paeta Biełarusi Jakuba Kołasa. Pra heta paviedamlaje «Radyjo Svaboda» sa spasyłkaj na pasolstva Biełarusi ŭ Litvie.
Fota Alaksieja Patryka, «Radyjo Svaboda»
Miemaryjalnaja šylda z nadpisam na litoŭskaj i biełaruskaj movach «U hetym budynku ŭ 1907 hodzie žyŭ i pracavaŭ narodny paet Biełarusi Jakub Kołas» budzie adkrytaja na budynku na skryžavańni vulic Trakų (Trockaj) i Pylimo (Zavalnaj).
Budynak sa statujami atłantaŭ, viadomy jašče z XV stahodździa, naležaŭ hrafam Tyškievičam. Jaŭstach Tyškievič, stvaralnik Łahojskaha i Vilenskaha muziejaŭ staražytnaściaŭ, zachoŭvaŭ tut častku svaich archieałahičnych zboraŭ.
Raniej u hetym budynku dziejničaŭ akruhovy sud, dzie z 1884 da 1898 hodu pracavaŭ advakatam Francišak Bahuševič. A jašče raniej tam źbiralisia paŭstancy Kastusia Kalinoŭskaha.
Z traŭnia 1907 da viasny 1908 hodu tut mieściłasia redakcyja «pieršaj biełaruskaj haziety z rysunkami» — «Našaj Nivy». U pamiaškańni redakcyi žyŭ i pracavaŭ Kanstancin Mickievič (Jakub Kołas).
