Marzaluk zapiarečyŭ Karpienku: Treba zvyčajnuju škołu padciahvać da ŭzroŭniu himnazij, a nie naadvarot
Minadukacyi na minułym tydni vystupiła ź niečakanaj idejaj: uraŭnavać škoły i himnazii pa prahramach navučańnia. Pryčym, ideja nie ŭ tym, kab škoły padciahnuć da ŭzroŭniu himnazii, a himnazii «apuścić» da ŭzroŭniu škoł. Bo, pa mierkavańni ministra adukacyi Ihara Karpienki, «adukacyja pavinna być roŭnadastupnaj, nie pavinna farmavacca niejkaja elitarnaść», a adbor talenavitych dziaciej na pavinien pieratvaracca ŭ spabornictva kašalkoŭ baćkoŭ.
Imhnienna pytańnie, što čakaje himnazii i ich vučniaŭ u bližejšym budučym, ŭschvalavała biełaruskaje hramadstva. Dałučycca da sprečki vyrašajuć navat deputaty parłamienta: na 29 listapada pryznačanyja parłamienckija słuchańni na temu «Nacyjanalnaja sistema adukacyi: stan i šlachi ŭdaskanalvańnia zakanadaŭčaha rehulavańnia».
Pa słovach staršyni kamisii pa adukacyi, kultury i navucy Pałaty pradstaŭnikoŭ Ihara Marzaluka, słuchańni płanavyja, budzie abmiarkoŭvacca prajekt novaha «Kodeksa ab adukacyi», ale nie abyjdziecca i biez abmierkavańnia budučaha himnazij. Užo vidavočna, što pazicyja deputataŭ i Minadukacyi ŭ pytańni «refarmavańnia» himnazij nie supadajuć.
«Ja hłyboka pierakanany ŭ adnym: himnazii pavinny isnavać - my nie pavinny stracić lepšych dziaciej i lepšyja škoły. Ja liču, što ŭsia fiłasofija pavinna być pabudavanaja na tym, kab zvyčajnuju škołu padciahvać da ŭzroŭniu himnazij, a nie naadvarot. A tam, dzie himnazii nie adpaviadajuć svajoj vysokaj naźvie, tam ich nie pavinna być. Adno, u čym ja zhodny ź ministram na 100% - nie pavinna być konkursu baćkoŭskich kašalkoŭ. Musić być konkurs intelektu», miarkuje Ihar Marzaluk.
Z kaleham zhodnaja i deputatka Alena Anisim.
«Ja za toje, kab himnazii, jak ustanovy, jakija siabie zarekamiendavali naležnym čynam, zastalisia. Ja za toje, kab pašyrałasia biełaruskamoŭnaja adukacyja, u tym liku praz stvareńnie himnazij ź biełaruskaj movaj navučańnia ŭ rajonnych centrach. A ŭžo što tyčycca taho, kali i jak tam ekzamieny zdavać, to heta treba abmiarkoŭvać», - kaža Alena Anisim.
U adkaz na zakid ministra adukacyi pra «niepatrebnuju elitarnaść», Ihar Marzaluk kaža pra nieabchodnaść intelektualnaj kankurencyi siarod roŭnych, i jak baćka himnazista-vydatnika dadaje:
«Samaje hałoŭnaje, što jość u himnazii — heta nieahresiŭnaje asiarodździe, heta matyvavanyja na dasiahnieńnie vysokaha pośpiechu i na pieramohi na alimpijadach dy konkursach, ź pierśpiektyvaj navukovych dasiahnieńniaŭ, dzieci i ich piedahohi. Bo dla taho, kab dzicia było talenavitaje, pavinny być talenavityja piedkalektyvy. A na siońnia ŭ pieravažnaj bolšaści himnazij vysokajakasnyja vykładčyki.
I himnazii vykonvajuć rolu vysokajakasnych navukova-mietadyčnych centraŭ dla ŭsich astatnich škoł i źjaŭlajucca ŭzoram. Nie kažu, što ŭsie. Ale tam jość schiema vielmi prostaja: kali dyrektar nie ciahnie, albo biare chabar, to jon pavinien albo być pazbaŭleny pracy, albo siadzieć u turmie. Ale kali my budziem za kryteryj brać jakaść, dasiahnieńni i ŭsio astatniaje, to my pabačym, što absalutnaja bolšaść himnazij hetuju zadaču vykonvaje».
Ale, ci moža tak zdarycca, što kiraŭnictva Minadukacyi mierkavańnie deputataŭ vysłuchaje, ale ŭsio adno zrobić pa-svojmu? Staršynia parłamienckaj kamisii spadziajecca, što ministr Karpienka nie zachoča «stvarać kanfrantacyju ŭ hramadstvie» i prysłuchajecca nie tolki da mierkavańnia narodnych abrańnikaŭ, ale i baćkoŭ.
«Mnie padajecca, što razam ź ministram, razam ź Ministerstvam adukacyi, našaj kamisijaj, a my svaje rekamiendacyi vypracujem, my prahavorym i pastarajemsia pryjści da niejkaha pazityŭnaha vyniku. Mnie chočacca ŭ heta vieryć», — kaža Ihar Marzaluk.
Pa słovach Marzaluka, niešta nakštałt ekzamienu ŭ himnazii pavinna zachavacca paśla čaćviortaha kłasa, suprać čaho vystupaje Minadukacyi. Jak pavinna zastacca śpiecyjalizacyja ź piataha kłasa, a nie ź dziaviataha, za što vystupaje ministr Karpienka.
***
Na telehram-kanał «Našaj Nivy» možna padpisacca tut.
