Zaŭtra la staličnaha Pałaca sportu adkryjuć koŭzanku
Na siezonnaj mabilnaj koŭzancy, raźmieščanaj la Pałaca sportu, iduć apošnija pryhatavańni pierad adkryćciom, jakoje zapłanavana na ranicu 28 kastryčnika, pieradajuć «Minsk-Naviny».
— U subotu, 28 kastryčnika, u 11:00 adbudziecca cyrymonija adkryćcia, — raspavioŭ načalnik katka Valeryj Nizaviec. — Čakajecca, što ź vitalnym słovam vystupiać pradstaŭniki administracyi Centralnaha rajona, projduć pakazalnyja vystupleńni junych fihurystaŭ i chakieistaŭ, u prahramie taksama konkursy dla hledačoŭ. Pieršy sieans — z 12:00 da 12:45. Jon budzie biaspłatnym. Na ŭsie nastupnyja sieansy ŭ subotu budzie źnižka 50 % — dla darosłych da 2,5 rubla, dla dziaciej — 1,5.
Pa słovach surazmoŭcy, u vychadnyja i śviatočnyja dni ceny na pasłuhi, jak i ŭ minułym siezonie, buduć krychu vyšejšyja (da 5 rubloŭ darosły i da 3 — dziciačy). U budni — tańniej. Prakat kańkoŭ — nie bolš za 3 rubli, zavostryvańnie — nie daražej za 5.
— Druhi hod zapar my pryznačajem adkryćcio koŭzanki da vosieńskich kanikuł u školnikaŭ, — praciahvaje Nizaviec. — U hetyja vychadnyja i na ŭvieś budučy tydzień zrobim dla ich źnižku na ŭvachodny kvitok 50 %. Płanujem taksama na ŭvieś siezon pa vychadnych zrabić źnižki dla siemjaŭ. Studentam vyhadna budzie prychodzić na apošnija dva sieansy ŭ subotu i niadzielu.
Katok budzie pracavać pa hrafiku minułaha siezonu: adkryćcio ŭ 11:00, zaviaršeńnie pracy — u 22:45. Štodnia naviedvalnikaŭ čakaje 12 sieansaŭ — u pačatku kožnaj hadziny. Praciahłaść kožnaha — 45 chvilin. U pierapynku budzie rabicca zalivańnie. U ranišni i dzionny čas na placoŭcy buduć treniravacca junyja chakieisty, jakija vystupajuć u turniry «Załataja šajba».