U Litvie abnarodujuć paviedamleńni ahientaŭ KDB
Centr daśledavańniaŭ hienacydu i rezistencyi žycharoŭ Litvy (CDHRŽŁ) pačynaje abnarodavańnie ahienturnych paviedamleńniaŭ ahientaŭ savieckaj śpiecsłužby KDB, paviedamlaje Delfi.
«Takich dakumientaŭ u Asobym archivie Litvy zachavałasia davoli šmat, ich abnarodavańnie pavinna dazvolić hramadstvu sfarmavać bolš dakładnaje ŭjaŭleńnie ab dziejnaści ahientaŭ KDB», — havorycca ŭ pres-relizie CDHRŽŁ.
Ahienturnaje paviedamleńnie — napisany rukoj ahienta tekst ab vykananym zadańni KDB ci infarmacyja, atrymanaja pa jaho asabistaj inicyjatyvie. Ahienturnaje paviedamleńnie padpisvałasia psieŭdanimam, kab nielha było paznać asobu ahienta. Pačynajecca abnarodavańnie ahienturnych paviedamleńniaŭ ahientaŭ, jakija dziejničali ŭ litoŭskich emihranckich arhanizacyjach: u Hałoŭnym kamitecie pa vyzvaleńni Litvy, Suśvietnaj litoŭskaj supołcy, Saviecie litoŭcaŭ Amieryki, Litoŭskaj supolnaści Amieryki i ŭ tavarystvie Santara-Sviesa.
Paźniej płanujecca apublikavać ahienturnyja paviedamleńni ab navukova-techničnaj vyviedcy i špijanažy, jakimi zajmalisia ahienty padčas navukovych i pracoŭnych stažyrovak. Niemałuju častku ahienturnych paviedamleńniaŭ składaje infarmacyja ad sakretnych supracoŭnikaŭ, jakija dziejničali ŭ asiarodździ Katalickaj carkvy. U pieryjad pierabudovy dziejnaść KDB asabliva aktyvizavałasia, tady «ŭvaskrašalisia» navat archiŭnyja ahienty KDB dla nazirańnia, kantrolu i ŭpłyvu na raspačatyja ŭ hramadstvie novyja pracesy, na dziejnaść Sajudzisa.
CDHRŽŁ publikuje infarmacyju ab dziejnaści KDB na sajcie www.kgbveikla.lt z 2011 hoda. Na siońniašni dzień na sajcie ŭžo apublikavana bolš za 5500 dakumientaŭ.
