MZS Biełarusi dapamahło vyrašyć kanflikt vakoł pomnika Kaściušku
Epapeja vakoł ušanavańnia ŭ Švajcaryi Tadevuša Kaściuški skončyłasia. Siońnia ŭ Zalaturnie, dzie pamior nacyjanalny hieroj Biełarusi, Polščy i ZŠA, ustalavali pomnik i šyldu ź biełaruskim nadpisam.
«Biez dapamohi hramadzkich arhanizacyjaŭ, fizyčnych asobaŭ, ich listoŭ i skarhaŭ heta było b niemahčyma. A paśla taho, jak pra skandał pačali šyroka pisać ŚMI, umiašaŭsia i MZS Biełarusi» — raspavioŭ Svabodzie staršynia Abjadnańnia biełarusaŭ Švajcaryi Alaksandar Sapieha.
Ustalavańnie pomnika zavieršyłasia siońnia papoŭdni. Razam z pomnikam zamacavanaja šylda z nadpisam «Tadevuš Kaściuška. 1746—1817. Ad Biełaruskaha abjadnańnia ŭ Švajcaryi. 2017 hod» pa-biełarusku i niamiecku. Hety tekst staŭ vynikam kampramisu paśla kanfliktu švajcarskich biełarusaŭ z polskim pasłom Jakubam Kumacham.
Polskamu dyplamatu nie spadabaŭsia tekst na šyldzie: «Synu Biełarusi ad udziačnych suajčyńńnikaŭ». Jon taksama prapanavaŭ admovicca ad biełaruskaj movy i pakinuć tolki niamieckamoŭny nadpis «Tadevuš Kaściuška. 1746—1817».
Pavodle Alaksandra Sapiehi, vyrašyć kanfliktnaje pytańnie dapamoh kiraŭnik biełaruskaj dyplamatyčnaj misii ŭ Švajcaryi Pavał Macukievič. Jašče da taho, jak biełaruskaja supołka ahučyła pretenzii polskaha boku publična, biełaruski dyplamat raiŭ sustrecca z meram Zalaturnu Kurtam Flury i vyrašać pytańnie ź im.
«Časovy pavierany sustreŭsia z meram i raspavioŭ, čamu biełarusy majuć lahičnaje prava pisać na šyldzie «Synu Biełarusi ad udziačnych suajčyńnikaŭ». Jon taksama nahadaŭ, što šmatmoŭnyja šyldy na pomnikach byvajuć vielmi časta. Ale mer adrazu, jašče pierad sustrečaj, napisaŭ, što «Syna Biełarusi» ŭ jakaści kampramisu być nia moža», — kaža Alaksandar Sapieha.
Biełarusy nastojvali, što na šyldzie abaviazkova maje być zhadany fundatar pomnika, a sam tekst pradublavany pa-biełarusku. U naźvie arhanizacyi-fundatara pavinna pisacca Belarussische, a nie Weissrussische.
«Mer nie adrazu zhadziŭsia, ale ŭ vyniku pieramovaŭ pryniaŭ heta. Pavodle našaj infarmacyi, rašeńnie jon prymaŭ samastojna, biez razmovaŭ z palakami», — kaža staršynia Abjadnańnia biełarusaŭ Švajcaryi i dadaje: — MZS vielmi nam dapamhło. Usie pieramovy z meram spadar Macukievič uziaŭ na siabie. Dumaju, što biez padtrymki ź Miensku heta było b niemahčyma».
Darečy, dziakujučy Pasolstvu Biełarusi ŭ Bernie byŭ znojdziejny sponsar, jaki kampensavaŭ Abjadnańniu biełarusaŭ Švajcaryi tracinu našych vydatkaŭ. Ahułam na vyrab i ŭstalavańnie pomnika vydadziena nia mienš za 7 tysiač eŭra.
Uračystaje adkryćcio pomnika ŭ Zalaturnie adbudziecca 21 kastryčnika. U cyrymonii, aprača pradstaŭnikoŭ biełaruskaj dyjaspary, žycharoŭ Zalaturnu, prymuć udzieł ambsadarka Litvy i kiraŭnik biełaruskaj dypmisii ŭ Bernie. Paśla rozhałasu ŭ ŚMI, biełarus z Fryburhu Alaksiej Šabłyka, jaki hraje ŭ miascovym arkiestry, prapanavaŭ vystupić na adkryćci razam sa svaim kalektyvam. Padčas adkryćcia pomniku jahony arkiestar vykanaje himny Biełarusi, Litvy i Švajcaryi.
* * *
Achviaravać na pomnik Kaściušku ŭ Biełarusi
