Rodnyja zahinułaha ŭ Barysavie sałdata asabista raskazvali ministru abarony pra situacyju ŭ častkach
Siamja zahinułaha ŭ sakaviku Arcioma Baściuka była na pryjomie ŭ Ministerstvie abarony za čatyry miesiacy da hibieli Alaksandra Koržyča.
Jak paviedamiła radyjo «Svaboda» Taćciana Baściuk, jana razam z mužam była na pryjomie ŭ Minabarony ŭ traŭni.
«My byli tam razam z mužam. Raskazali pra ŭsio, što viedali ad syna. Pra toje, jak sprabavali razmaŭlać z kamandziram častki. Na sustrečy prysutničaŭ asabista ministar abarony, jaho namieśniki. Čałaviek 15 tam było. Sakratary ŭsie našy słovy zapisvali. Ministar abarony nam paabiacaŭ va ŭsim razabracca», — raskazała Taćciana Baściuk.
25-hadovy Arciom Baściuk byŭ 31 sakavika znojdzieny paviešanym na terytoryi vajskovaj častki № 25849, što mieścicca pobač z vajskovym haradkom Piečy ŭ Barysavie. Pavodle rodnych, za niekalki tydniaŭ da śmierci jon u prysutnaści baćkoŭ nazyvaŭ kamandziru imiony i proźviščy tych vajskoŭcaŭ, jakija akazvali na jaho cisk. 12 kastryčnika Śledčy kamitet paviedamiŭ, što sprava ab śmierci Baściuka zakrytaja za niedachopam dokazaŭ.
3 kastryčnika ŭ sklepie medyčnaj roty ŭ Piečach byŭ znojdzieny paviešanym 21-hadovy Alaksandar Koržyč, jaki prachodziŭ terminovuju słužbu.