«Hod sustrakaŭsia, a jana akazałasia leśbijankaj». Ahniavyja «padsłuchanyja» historyi biełarusaŭ
Kali raniej usie pierapisvalisia na forumach, to z časam płaŭna pieramiaścilisia ŭ tematyčnyja supołki ŭ sacsietkach.
Fota Siarhieja Hudzilina.
«Šukaju ciabie», «Pryznavaški», «Razumnicy», «Kurycy», «Samyja pryhožyja ludzi», «Pachabny», «Znajomstvy»… U dziasiatkach pablikaŭ ludzi abmieńvajucca navinami, znajomiacca, krytykujuć i dajuć adno adnamu parady. Plus u tym, što dla kožnaha biełaruskaha horada jość svaja supołka, tamu lohka być u kursie taho, što adbyvajecca ŭ tvaim rajonie ci vobłaści, navat kali ty ŭ hety momant žyvieš za miažoj.
Siarod inšych asabliva vyłučajucca staronki sa šmattysiačnaj aŭdytoryjaj «Padsłuchana», dzie ludzi ananimna dzielacca svaimi žyćciovymi historyjami.
Prava nie nazyvać svajo imia, a, značyć, i nie nieści adkaznaść za svaje słovy, dazvalaje svabodna vykazvacca na temy, jakija nie zaŭsiody ahučyš navat psichołahu. Tym bolš, u internecie daduć biaspłatnuju paradu, praŭda, nie fakt, što heta dapamoža.
My praanalizavali samyja papularnyja pabliki «Padsłuchana» šaści abłasnych biełaruskich centraŭ i zrabili vysnovy, što najbolš chvaluje našych suhramadzian. Uschodniaja častka krainy ŭ hetym płanie vyhladaje najbolš aktyŭnaj.
Padpisanty mahiloŭskaha pablika zaŭsiody ŭ kursie apošnich navin, jany abmiarkoŭvajuć ich pastajanna. Jany žadajuć adno adnamu dobraj ranicy, razdajuć kotak i sabak, šukajuć zhublenyja piarścionki i kašalki, padbirajuć kampanii, kab razam naviedać trenažornuju zału, tancy ci prosta prahulacca ŭviečary.
Mahiloŭcaŭ razdražniajuć hołyja torsy mužčyn u transparcie i śmiećcie, jakoje haradžanie lubiać vykidać to z voknaŭ, to sabie pad nohi.
A jašče šmat miascovych nie chočuć słužyć u vojsku. Kab adkasić, prapanujuć palažać u «varjatni», nabić na tvar tatuiroŭku ci časova stać hiejam. Karaciej, narod u nas prosty.
Dla žycharoŭ Viciebska ŭ 21 stahodździ ŭsio jašče aktualnyja pošuki dobraj varažbitki.
Miascovyja kabiety vučać ziamlačak siadać chłopcam na kaleni, kali tyja nie sastupajuć miesca ŭ transparcie. Usie razam, jak i ŭ Minsku, łajacca na aŭtamabilistaŭ, što parkujucca nie pa praviłach (niadaŭna praz takich voś małajcoŭ u dvor adnaho ź viciebskich damoŭ nie zmahła prajechać pažarnaja mašyna).
Hamielčuki z zajzdrosnaj pieryjadyčnaściu abmiarkoŭvajuć miedycynu: zaklikajuć naviednikaŭ balnic nie zachodzić u kabiniety, kali tam niekamu robiać renthien ci chtości siadzić u hiniekałahičnym kreśle. Plus u miascovych da hetaha času nie źnik azart, źviazany z kalekcyjanavańniem bonścikaŭ.
U Hrodnie čaściej za ŭsio abmiarkoŭvajuć zakupy praduktami i adzieńniem u krainach-susiedkach, ale ciapier ich pablik «Padsłuchana» amal zahłuch. Toje samaje možna skazać i pra Brest. Čamuści ŭ zachodniaj častcy krainy pabliki z manałohami nie pryžylisia.
Što tyčycca minčukoŭ, to jany niezadavolenyja marudnymi terminałami, maleńkimi zarobkami, cyhanami, jakija lipnuć na vulicach, tym, što ludziam ź invalidnaściu składana pracaŭładkavacca, a ŭ mietro treba sastupać miesca nachabnym babulam.
Ale bolš za inšaje žycharoŭ usich abłasnych haradoŭ chvalujuć adnosiny i seks — mienavita hetamu pryśviačajecca kožny druhi post.
— Jak znajści novaha muža, kali ty raźviałasia, ale maješ dzicia?
— Što rabić, kali tabie 27, usie adnakłaśniki majuć siamji, a ty ŭsio jašče biez adnosin?
— Čamu chłopcaŭ pryvablivajuć «TP»?
— Što rabić, kali muž chavaje telefon i nie daje pačytać svaje paviedamleńni?
— Što rabić, kali žonka admaŭlaje ŭ seksie ŭ jakaści manipulacyi?
— Čamu žančyn cikaviać tolki hrošy?
— Jak raźvieścisia z mužam i pakinuć na jaho dzicia?
Kožny dzień u pablikach źjaŭlajecca novaja nieščaślivaja (radziej — naadvarot) historyja. U kamienty adrazu ž nabiahajuć usioznajki-psichołahi. Prapanujem aznajomicca z samymi vohniennymi, što źjavilisia ŭ apošni čas (jak ličycie, ci jość siarod ich fejki?).
