Śledčy kamitet ahučyŭ try viersii śmierci sałdata ŭ Piačach
Śledčy kamitet zrabiŭ aficyjnuju zajavu nakont śmierci Alaksandra Koržyča.
Pa słovach aficyjnaha pradstaŭnika SK Siarhieja Kabakoviča, śledčymi razhladajucca try viersii padziej.
Pieršaja — «dziady» daviali Koržyča da samahubstva ździekami. Druhaja — jon sam paviesiŭsia praź psichałahičnuju traŭmu. I treciaja viersija — zabojstva, bo Koržyč moh mieć kampramietujučyja źviestki, datyčnyja sasłužyŭcaŭ.
Suprać viersii pra psichałahičnuju traŭmu kaža toj fakt, što ŭ miedčastcy, jak paviedamiŭ Kabakovič, psichijatr ahledzieŭ Koržyča i pastaviŭ jamu dyjahnaz: «zdarovy».
Sałdata znajšli ŭ padvale — Koržyč visieŭ na bručnym ramiani, jaki macavaŭsia da armatury pad stollu. Nohi byli pieraviazanyja šnurkom ad abutku, na hałavu naciahnuta majka.
Sasłužyŭcy raskazali śledčym, što pavodziny Koržyča źmianilisia ad 7 vieraśnia. Jon pačaŭ skardzicca na zdaroŭje, na bol u vobłaści serca. Ale pra samahubstva nie havaryŭ.
«Kamandzir adździaleńnia, siaržant, staviŭ Koržyča ŭ bolš pryvilejavany stan adnosna inšych, bo pamiž imi isnavali niestatutnyja ŭzajemaadnosiny. Siaržantu pieradavalisia hrošy, telefon, charčavańnie, cyharety, — paviedamili śledčyja. — Akramia taho, z boku kamandziraŭ adździaleńniaŭ isnavali momanty złoŭžyvańnia ŭładaj. Jany brali hrošy z sałdat za prava tych karystacca telefonami, sumy byli roznyja, ad 20 da 40 rubloŭ».
Dvoje siaržantaŭ aficyjna pryznanyja padazravanymi pa spravie ab parušeńni statutnych uzajemaadnosin. Vinavatym moža pahražać da 12 hadoŭ źniavoleńnia. Ciapier vyrašajecca, ci buduć zatrymanyja jany.
Na staršynu roty, praparščyka Artura Virbała, taksama zaviali kryminalnuju spravu — za machlarstva. Pa viersii śledčych, Virbał źniaŭ z kartki Koržyča nie mienš za 180 rubloŭ, raźličvaŭsia joju ŭ kramach i kaviarniach Barysava.
Ahułam pa spravie ab śmierci Koržyča dapytajuć bolš za 160 čałaviek ź miedroty i sasłužyŭcaŭ.
