U biełsataŭcaŭ kanfiskujuć darahoje prafiesijnaje abstalavańnie
Takoje rašeńnie pryniała sudździa suda Pieršamajskaha rajona Minska Nastaśsia Papko ŭ spravie ab aŭtarskim pravie na handlovy znak «Biełsat», paviedamlaje pres-słužba Biełaruskaj asacyjacyi žurnalistaŭ.
Žurnalista Alaksandra Barazienku pryznali vynavatym u parušeńni aŭtarskaha prava na handlovy znak «Biełsat». Jaho aštrafavali na 40 bazavych vieličyń (920 rubloŭ), taksama pryznačanaja kanfiskacyja ŭsioj techniki, jakuju zabrali ŭ samoha Barazienki i na ofisach telekanała.
Nahadajem, paśla zatrymańnia jašče ŭ sakaviku 2017 hoda Adździeł pa baraćbie z ekanamičnymi złačynstvami skłaŭ na Barazienku pratakoł pa artykule 9.21 KaAP Biełarusi. Barazienku dapytvali ŭ izalatary časovaha ŭtrymańnia na Akreścina, dzie žurnalist adbyvaŭ 15-sutkavy aryšt, paralelna z čym nalapili na jaho videatechniku samarobnyja nalepki z łahatypam telekanała «Biełsat» i zabrali jaje da rašeńnia suda.
Taksama 31 sakavika ŭ ofisach telekanała prajšli pieratrusy, milicyja ŭ miežach hetaj ža spravy pa aŭtarskim pravie zabrała techniku z dvuch pamiaškańniaŭ, a taksama asabistuju techniku jašče adnaho žurnalista — Alaksandra Lubienčuka. Žurnalisty «Biełsata» nazyvajuć spravu vidavočnaj pravakacyjaj z metaj adabrać techniku, a taksama akazać cisk na telekanał i supracoŭnikaŭ.
U žniŭni sud užo razhladaŭ dadzienuju spravu.
Tady ŭ sudzie vystupiŭ aŭtar milicejskaha pratakoła Uładzisłaŭ Padrez, a taksama šerah śviedkaŭ, jakija paćvierdzili słovy žurnalista pra adsutnaść markiroŭki «Biełsat» na technicy.
Z-za najaŭnaści vialikaj kolkaści parušeńniaŭ sudździa Dźmitryj Cykał tady adpraviŭ pratakoł u milicyju na dapracoŭku. Pratakoł dapracavali i znoŭ viarnuli ŭ sud, dzie i adbudziecca praces.
10 kastryčnika 2017 hoda sud Pieršamajskaha rajona Minska praciahnuŭ razhlad spravy i vynies vierdykt.
U sudzie Alaksandr Barazienka paŭtaryŭ raniejšyja pakazańni, što jon supracoŭničaje ź infarmacyjnym ahienctvam News Informacje, jakoje ŭ svaju čarhu supracoŭničaje z «Biełsatam». Barazienka padkreśliŭ, što ŭsia technika, zabranaja ŭ jaho ŭ Dzień Voli 25 sakavika, nie ŭvodziłasia ŭ hramadzianski abarot tavaraŭ — nie pradavałasia i nie zdavałasia. Technika vykarystoŭvałasia vyklučna dla asabistaj pracy.
Nakont techniki, zabranaj u ofisach «Biełsata», Brazienka patłumačyŭ, što technika jamu nie naležyć, ale jon sapraŭdy karystaŭsia joj ŭ asabistaj pracy, kali rychtavaŭ infarmacyjnyja materyjały.
«Adnak nijakich pasłuh pa pieradačy čužoha kantentu, kantentu z tavarnym znakam «Biełsat», ja nie akazvaŭ. Tolki rychtavaŭ ułasnyja materyjały,» — padkreśliŭ Alaksandr.
U sudzie taksama apytali śpiecyjalista — Alaksandra Hrybło, dyrektara dyrekcyi techničnaha raźvićcia Biełteleradyjokampanii, dzie jon pracuje z 1994 hoda.
Ekśpiert zajaviŭ, što abstalavańnie, jakoje zabrali ŭ Barazienki — kropka dostupa ŭ internet — heta śpiecyjalny terminał dla pieradačy infarmacyi. Takoje prystasavańnie vykarystoŭvajecca ŭsimi telekampanijami Jeŭropy. Prykładny košt takoha abstalavańnia — 25 tysiač jeŭra.
Alaksandr Hrybło paviedamiŭ, što takoje abstalavańnie mahli nabyć tolki telekampanii. U pryvatnaj asoby abstalavańnie mahło apynucca tolki pa damovie z telekampanijaj.
Z materyjałaŭ spravy vynikaje, što adresy ofisaŭ «Biełsata» ŭ Minsku paviedamiŭ u milicyju Alaksandr Bielakoŭ — čałaviek, jaki ŭ Biełarusi vałodaje pravam na handlovy znak «Biełsat». Jon zajaviŭ u milicyju, što jamu viadoma, što ŭ dadzienych pamiaškańniach parušajucca jaho pravy.
Taksama ŭ materyjałach spravy jość infarmacyja ad pravajdera «Diełovaja sieť» pra abjomy i źmiest i dadzienych, jakija adpraŭlalisia z ofisa «Biełsata» ŭ Minsku.
Sprava vakoł tavarnaha znaku «Biełsat» ciahniecca amal piać hadoŭ. Pavodle ŭładalnika firmy «BIEŁSATplus» telekanał parušaje intaresy jahonaha biźniesu. Pradprymalnik źviarnuŭsia ŭ Viarchoŭny sud, ale jon nie zadavoliŭ jahonyja patrabavańni.
Tady ŭłaśnik firmy «BIEŁSATplus» namahaŭsia zabaranić telekanału vykarystoŭvać tavarny znak «Biełsat TV» («Belsat TV»). Ale Viarchoŭny Sud paličyŭ patrabavańni nieabhruntavanymi.
Paŭtorny razhlad spravy inicyjavaŭ prezidyum Viarchoŭnaha sudu, a spravu razhladaŭ inšy skład sudździaŭ. 4 vieraśnia 2014 hodu sud zadavoliŭ pazoŭ Andreja Bielakova i zabaraniŭ telekanału vykarystoŭvać handlovy znak «Biełsat TV» pry tranślacyi na terytoryju Biełarusi dy na internet-staroncy.
