Tureckija archieołahi śćviardžajuć, što znajšli mahiłu Mikałaja Cudatvorca
Tureckija archieołahi paviedamili, što, jak miarkujecca, znajšli miesca pachavańnia Mikałaja Cudatvorca, piša VVS. Na Zachadzie jaho nazyvajuć Śviatym Mikałajem, a taksama viedajuć jak Santa Kłaŭsa. Tyja ž moščy, jakija znachodziacca ŭ italjanskim Bary, naležać inšamu čałavieku, kažuć tureckija ekśpierty.
Tut i nižej fota: TASS
Paviedamlajecca, što niepaškodžanaja hrabnica znajšłasia ŭ padziemnych pamiaškańniach carkvy Śviatoha Mikałaja ŭ rajonie tureckaha Demre, u paŭdniova-zachodniaj pravincyi Antalja.
Nievialiki horad Demre byŭ pabudavany na ruinach staražytnaha likijskaha horada Mira (Miry), dzie Śviaty Mikałaj, jak miarkujecca, žyŭ u čaćviortym stahodździ.
Carkva Śviatoha Mikałaja ŭ Demre — jaho hałoŭnaja turystyčnaja słavutaść i papularnaje miesca pałomnictva chryścijan. Archieałahičnyja raboty iduć tam užo 20 hadoŭ.
«Chram u padziamielli carkvy dajšoŭ da našych dzion u dobrym stanie, — raspavioŭ tureckaj haziecie «Chiuryjet» Džamył Karabajram, jaki adkazvaje ŭ Antalji za hieadeziju i pomniki. — Dumajem, što jamu škody nie naniesiena. Ale tudy składana zajści, bo na ŭvachodzie pakładzienaja mazaika. Spačatku jaje treba daśledavać kavałačak za kavałačkam, i tolki potym ahladać pachavańnie».
Pry daśledavańni hrabnicy navukoŭcy vykarystoŭvajuć kampjutarnuju tamahrafiju i hiearadar. Raboty nabližajucca da zaviaršeńnia.
Bazilika Śviatoha Mikałaja ŭ Bary, dzie, jak ličyłasia, zachoŭvajucca moščy Cudatvorca.
Ličycca, što vialikuju častku moščaŭ u 1087 hodzie z zavajavanaj ciurkskaj dynastyjaj sieldžukidaŭ Miry zabrali italjanskija kupcy.
Mienšaja častka zastałasia tam, i paźniej ich zabrali vieniecyjancy. Ciapier hetaja častka zachoŭvajecca ŭ kaściole śviatoha Mikałaja na vostravie Lido ŭ Vieniecyi.
Da hetaha času ličyłasia, što bolšaja častka moščaŭ Śviatoha Mikałaja, pryviezienaja kupcami ŭ Italiju, zachoŭvajecca ŭ italjanskim horadzie Bary.
U mai 2017 hoda ŭpieršyniu za 930 hadoŭ moščy, jakija zachoŭvalisia ŭ Bary, vyvieźli za miežy horada. Ich adpravili ŭ Rasiju, dzie z žadajučych prykłaścisia da ich vystrailisia vializnyja čerhi.
Džamył Karabajram u kamientary haziecie «Chiuryjet» taksama paviedamiŭ, spasłaŭšysia na ekśpiertaŭ, što pry vyvučeńni staradaŭnich papier znajšlisia śviedčańni taho, što moščy ŭ Bary naležali inšamu śviataru.
Mikałaj z Patara (Śviaty Mikałaj) byŭ biskupam u Mirach. Paśla jaho śmierci u 343 hodzie na miescy jaho mahiły pabudavali baziliku, a ŭ pačatku dziaviataha stahodździa — carkvu.
Mikałaj Cudatvorac šanujecca chryścijanami za svaju pakoru i ščodraść, asabliva da dziaciej. Dabrynia Śviatoha Mikałaja zastałasia lehiendaj u stahodździach, i była papularyzavanaja ŭ kultury ŭ vobrazie «Baciuchny Rastva», jaki doryć dzieciam padarunki.
Hałandcy ŭ Amierycy prydumali inšuju viersiju pad imiem Sintakłaas, i tam užo raspaŭsiudziłasia imia Santa Kłaŭs, šyroka vykarystoŭvajecca siońnia.
