U Nobieleŭskim kamitecie patłumačyli, čamu bolšaść łaŭreataŭ — z ZŠA, i jak inšym krainam dabicca dobrych vynikaŭ
Na pres-kanfierencyi paśla abviaščeńnia łaŭreataŭ premii pa chimii było padniataje vielmi cikavaje pytańnie: čamu siarod nobieleŭskich łaŭreataŭ tak šmat amierykancaŭ. Sakratar Šviedskaj karaleŭskaj akademii navuk Horan Chansan patłumačyŭ, čamu, na jaho dumku, tak adbyvajecca.
Dasłoŭna pytańnie ad adnaho z žurnalistaŭ hučała tak: «Ciapier u nas jość dzieviać łaŭreataŭ, siem ź jakich — z ZŠA. Ci možacie vy prakamientavać, u čym pryčyna takoj situacyi?».
«Z časoŭ Druhoj suśvietnaj vajny ZŠA dazvalajuć navukoŭcam pravodzić fundamientalnyja daśledavańni ŭ halinach, važnych dla navuki, nie patrabujučy nieadkładnaha praktyčnaha vyniku i nie kantralujučy ich pracu z palityčnaha punktu hledžańnia. Hetaja svaboda razam ź vielmi dobrymi resursami spracavali na karyść Złučanym štatam», — adkazaŭ Chansan.
Jon taksama dadaŭ, što i ŭ inšych krainach univiersitety mohuć vychoŭvać vialikuju kolkaść nobieleŭskich łaŭreataŭ. Nieabchodnaj umovaj dla hetaha jon nazvaŭ asablivuju intelektualnuju atmaśfieru i najaŭnaść resursaŭ dla praviadzieńnia fundamientalnych daśledavańniaŭ.
Navat u tych krainach, u jakich nie vielmi šmat resursaŭ, možna damahčysia dobrych vynikaŭ, kali budzie stvorany taki «intelektualny klimat».
Kiraŭnik nobieleŭskaha kamiteta pa chimii, Sara Snohierup Linse, praciahnuła: «Mahu dadać, što akademičnaja svaboda, biezumoŭna, — klučavy faktar dla značnych navukovych adkryćciaŭ. My zaprašajem univiersitety i asobnych navukoŭcaŭ taksama naminavać svaich kaleh na Nobieleŭskuju premiju».
