Biełaruska z Katałonii: Zaŭtra ludzi źbirajucca z 5.00 dziažuryć na vybarčych učastkach
Bolšaść katałoncaŭ zaŭtra pryjdzie na ŭčastki i prahałasuje za niezaležnaść, prahnazuje 42-hadovaja Natalla Žukoŭskaja.
Jana žyvie ŭ 120-tysiačnym horadzie Mataro za 30 km ad Barsiełony.
«U nas spakojna i śviatočna», — raskazała Natalla «Našaj Nivie» ŭ subotu ŭviečary, napiaredadni refierendumu.
Refierendum pryznačany na niadzielu 1 kastryčnika. Centralny ŭrad Ispanii dabiŭsia pryznańnia hałasavańnia niezakonnym. Na dumku Natalli Žukoŭskaj, sproby centralnaha ŭrada zabaranić i sarvać refierendum paspryjali mabilizacyi katałoncaŭ.
Čytajcie taksama na katałonskim partale: EN DIRECTE: Recta final per al referèndum
«Ispanski ŭrad nie pierastaje dałučać novych ludziej, kali nie prychilnikaŭ niezaležnaści, dyk achvotnych hałasavać», — iranizuje Natalla.
Ściah katałonskich niezaležnikaŭ.
Pa jaje słovach, palicyja zdoleła skanfiskavać tolki častku biuleteniaŭ. «Katałonski ŭrad paabiacaŭ, što zaŭtra na ŭčastkach buduć i biuleteni, i skryni. Darečy, zaŭčora na mitynhu, što ładziła ŭ nas adna ź niezaležnickich partyj, razdavali biuleteni ŭsim achvočym, biez abmiežavańnia ŭ adny ruki», — raskazvaje jana.
«Detali płana dziejnaści ŭ vypadku, kali palicyja budzie zachoplivać učastki i kanfiskoŭvać skryni, urad nie ahučyŭ, ale zapeŭniŭ, što mahčymaść prahałasavać budzie zabiaśpiečana ŭ kožnym vypadku, — kaža Natalla Žukoŭskaja. — Asabisty płan našaj siamji — zaŭtra a 5-j ranicy być na ŭčastku. Da hetaha zaklikała kaalicyja ŭ padtrymku refierendumu. Takim čynam my svajoj prysutnaściu abaronim miescy dla hałasavańnia», — dabaŭlaje Natalla.
Na mitynhi katałonskich niezaležnikaŭ dačka Natalli Žukoŭskaj zaplataje ŭ kosy dźvie stužački: biełaruskuju i katałonskuju.
Naradziłasia Natalla Žukoŭskaja ŭ Baranavičach. Skončyła Minski dziaržaŭny linhvistyčny ŭniviersitet. U Katałonii žyvie ad 2001 hoda. Zachavała cudoŭnuju biełaruskuju movu i poviazi z radzimaj i byłymi adnakurśnikami.
Zaŭtra na ŭčastak jana źbirajecca pajści razam z mužam.